Dialuna a tuma luga na Sint Maarten e reunion anual Koninkrijksoverleg Buitenlandse Betrekkingen. Esaki ta un reunion entre Minister President di Aruba, St. Maarten y Corsou y Minister di Relacion Exterior di Hulanda. Relacionnan Exterior ta un asunto cu ta regarda Reino y durante reunion anual aki, ta trata diferente topico ampliamente.
Un topico hopi importante cu a haya atencion ta e topico di Comercio y oportunidadnan economico. Prome Minister Evelyn Wever-Croes a expresa cu Aruba recientemente a publica nos vision economico y den e reunion a keda palabra cu den cuadro di Reino y embahadanan di Reino rond mundo, lo haci uzo di instrumentonan pa promove e agenda economico y atrae inversionistanan. Esaki ta crea oportunidadnan pa Aruba haya mas inversionista.
Tambe a haci palabracionnan cu lo colabora mas den organisacionnan regional manera Eclac y Caricom cu tin cierto beneficionan pa islanan manera Aruba, y especialmente pa Aruba por tin acceso na fondonan di e organisacionnan internacional aki. Den esaki a discuti tambe e consecuencianan di Brexit y e fondonan cu Union Europeo ta pone disponibel pa e islanan LGO, entre otro Aruba, Corsou y Sint Maarten. Hulanda a compromete pa haci su maximo esfuerso pa e fondonan cu Union Europeo ta pone disponibel no wordo reduci despues cu Inglatera sali di Union Europeo aki 6 luna.
Manera ta conoci ta a traves di Union Europeo, Aruba ta gosando di financiamento di proyectonan importante, sin costo alguno. E facultad nobo na Universidad, e SISSTEM ta un di e proyectonan importante y Aruba no kier perde mas oportunidad asina den futuro. E compromiso di Hulanda ta un prome paso. Awor mester warda riba e decision di Union Europeo riba esaki.
“Pa Aruba, e punto aki di agenda ta hopi importante especialmente mirando cu nos a publica recientemente e vision economico y e desaroyo economico cu Aruba kier atrae. Hunto nos ta mas fuerte para pa atrae inversionistanan pa nos logra nos vision economico”, Prome Minister a duna di conoce.
Venezuela
E punto principal riba e topico aki ta e hecho cu nos mester coordina tur esfuerso y alinea tur strategia pa por sali afo fuerte. Den decisionnan cu mester wordo tuma mester tene cuenta cu e posicion di e islanan, mirando cu nos ta asina serca di Venezuela.
Mi a splica cu nos ta convivi cu Venezuela pero na e momento aki nos mester pensa riba Aruba, pasobra si nos no pensa riba Aruba, ken ta hasie.
Aruba tin caba miles di persona ilegal di Venezuela di cual centenares di mucha cu ta bai scol. Esaki ta pone un presion inhusto y grandi riba nos na Aruba. Nos ta deal cun’e y ta busca apoyo di Hulanda y organisacionnan internacional pa yuda nos den esaki. Nos tin proceduranan pa atende cu peticionnan di asilo y ta cumpli cu derecho humano di tur hende.
E crisis migratorio na Venezuela y su impacto na Aruba ta afecta nos siguridad, nos finansas publico y finalmente e bienestar di nos pueblo. Esey tin nos preocupa y ta un reto tur dia pa mantene e balanse.
Pesey mi a splica durante e reunion cu cu duele na nos curason cu talves nos kier yuda mas, pero nos no por yuda mas. Awor nos mester yuda Aruba y yuda nos mes. Hulanda a compronde e mensahe y ta sostene Aruba su posicion den esaki.
Visa pa Venezuela
Aruba a pidi algun luna pasa pa introdusi Visa pa Venezuela. Esaki ta un asunto cu ta regarda Reino y pa introdusi Visa pa un pais mester tin consensus den Reino.
Mirando cu nos no a logra e consensus ainda y mirando cu nos kier pone mas control na frontera y mas exigencia pa esnan cu bin di Venezuela cumpli cune, nos ta trahando riba un tipo di ESTA manera ta conosi na Merca