Diabierna atardi, sindicato STA conhuntamente cu e delegadonan di “NV ELMAR” a reuni cu Su Excelencia, Prome Minister Sra. mr.Eveline Wever-Croes tocante e situacion na e compania. Hopi ta e puntonan cu a bin dilanti pero loke mas a resalta toch ta e paz laboral cu ta reinando actualmente na “NV ELMAR”.
STA a trece tambe den e reunion su deseo pa stop di hinca Uitzendbureau den companianan estatal y tambe pa cuminsa negocia un contrato colectivo nobo sacando e puntonan afo cu tin e empleadonan molestia. Mas aleu, STA ta di opinion cu e compania mester tuma hende den servicio permanente cual ta mas beneficioso pe compania y e empleadonan y lo yuda tambe den e fondo di pension. A haci un apelacion pa mantene esnan cu t’ey caba den servicio via uitzendbureau y haci nan empleado permanente. A splica tambe ariba cierto compania cu ta haciendo trabao pa ELMAR cu paden di e compania mes por wordo haci por ehempel e Departamento di Recursonan Humano.
A elabora tambe ariba “UTILITIES NV” cu den concepto di STA hopi placa a wordo malgasta innecesariamente na cosnan cu no a beneficia ni e compania ni e pais. Tabata un reunion hopi fructifero, caminda cu directiva como tambe e delegadonan ta convenci cu cambionan positivo ta na caminda. Esaki ta conta no solamente pa NV ELMAR sino pa henter e pueblo di Aruba.