Sindicato di Maestro, Simar a yama un conferencia di prensa extra ordinario p’asina haci un yamada nan tur su miembronan y no miembronan tambe cu ta eherce e trabao di maestro pa ta presente mañan Diabierna 18 di October 2019 pa un reunion informativo riba e topico di Indexering. E presidente di sindicato di maestro a sigui bisa tambe cu dos diferente directiva di scol a manda carta pa nan maestronan caminda lo aplica regla pero e presidente di sindicato a bisa cu e reunion di Diabierna lo no ta largo y si e directivanan aplica e regla aki cu ta “no work no pay” e cantidad di placa cu e maestronan no lo haya si nan no ta presente na scol, ta tiki den comparacion cu e indexering si esaki wordo paga manera a wordo priminti. Pues si bisa cu maestronan haya 100 Florin di Indexering y pa aña ta 1200 Florin, pues e suma cu maestronan lo perde pa asisti na e reunion di Diabierna ta uno masha chikito den comparacion. Loke e presidente di SIMAR a bisa tambe ta cu si SKOA, den e caso aki, a mal informa su docentenan dor di bisa nan cu nan ta responsabel pa informa mayor y opvang di alumnonan y akinan SIMAR kier referi na un carta cu Minister di Enseñanza mes a manda cu ta data 5 di Augustus den cual ta wordo bisa cu School Bestuur ta responsabel pa e studiantenan y esaki ta conta ora cu e docente ta pidi BVVD ora cu esaki ta langdurig si of den caso di mañan cu tin un reunion extra ordinario, eynan tambe por bisa e ora ey e school bestuur ta esun responsabel pa e alumnonan. E sindicato tambe a duna un otro ehempel caminda cu scolnan di BPS a manda carta pa mayornan informandonan cu scol Diabierna ta cumina 9.30 di anochi. Pues akinan ta mira cu nan si ta tumando na responsabilidad di informa e mayornan y tambe tuma responsabilidad di opvang e muchanan. E motibo pakico SIMAR ta yamando e reunion aki ta cu for di April caba ta bezig cu diferente sindicato y bezig tambe cu Gobierno riba e parti aki di Indexering pasobra na 2014 tabatin un acuerdo bilateral unda a bisa cu depende sin tin inflacion of no lo por wak e ora ey na aña 2019 pa wak si por bin Indexering. Ora cu a tuma nota na cuminzamento di aña cu CBS a mustra cu tabatin un inflacion di 3.6 y actualmente ya el a pasa 5 dus e ora ey sindicatonan a aserca Gobierno pa por bin cu un propuesta y bisa cu bon ta pidi 3.6 y e ora ki contra propuesta Gobierno lo bin cune. Pero SIMAR tin cu bisa cu lamentablemente te cu awe na October te ainda no a tende nada di Gobierno y esaki ta algo di lamenta. E ora ey ta e deber di sindicato pa yama su miembronan y informa nan cu defacto no ta yegando niun caminda. Pesey atrobe SIMAR a dicidi cu Diabierna ta un momento pa yega y informa tur docente y como sindicato mag di pone reunion bao di oranan di trabao y esaki no ta nada ilegal pasobra e ta algo cu mag di haci y ta hasta teniendo cuenta cu ta haci’e mainta tempran y despues di 9’or tur docente ta bai bek scol pa esakinan por sigui normal. SIMAR kier informa e docentenan un biaha mas pa acudi Diabierna pasobra awo ta e momento a vocifera preocupacion y tambe para pa bo mesun derecho. Pues SIMAR ta haci un yamada na tur miembro y no miembro tambe pa acudi Diabierna 19 di October na oficina di SIMAR p’asina scucha kico ta pasando. E reunion di Diabierna manera conoci ta uno mas bien informativo y despues lo bini un otro reunion p’asina fiha kico ta e proximo paso cu e miembronan kier tuma.