Den e prome parti di September, director di METEO Aruba a attende un reunion importante di Organisacion Meteorologico Mundial (WMO) na Corsou.Den e reunion importante aki a atende diferente pais di Caribe, Zuid, Midden y Noord America. E director di METEO a representa Aruba (DMA) y Hulanda (KNMI). Director di METEO a duna un presentacion, indicando tur e uzonan di datonan meteorologico cu ta procedente di satellite na Aruba, y a indica tambe backup-plans pa e posibel cambio di GOES13 pa GOES-R(GOES16). November 4, 2016 Merca lo lansa un satelite di tempo nobo den orbita. E satelite aki lo reemplasa GOES13 of GOES15. GOES13 ta wordo uza actualmente pa tur METEOnan cu tin interes den datonan den e parti Atlantico. GOES15 ta wordo uza pa e METEOnan cu ta mas interesa den datonan pa e parti Pacifico.
E Satelite GOES-R ta bay tin hopi mas aparato pa midi diferente condicion meteorologico, climatologico y datonan di solo. GOES-R lo yuda den pronostico di horcan su forsa y ruta, mehora avisonan di tornado y mal tempo, mehora planeamento di ruta pa avion bula, y mehora avisonan di actividad solar. Door cu e Satelite GOES-R lo ta emitiendo basta mas dato cu GOES13/15 kiermen cu METEOnan mester bay inverti den sistemanan nobo pa ricibi y procesa dato via satelite, e sistemanan bieu lo bira obsoleto. Adicionalmente datonan cu ta wordo uza pa departementonan di emergencia como backup pa datonan di horcan y tsunami lo mester cambia full, ya cu esakinan tambe lo bira obsoleto. Despues di un periodo di test GOES-R lo bira GOES16 y lo reemplasa GOES13 o GOES15, aunke cu ta parse cu GOES13 lo wordo reemplasa. Si GOES-R no reemplasa GOES13, e ora dentro di 2 aña GOES-S lo reemplasa GOES13. Director di METEO a wordo invita pa Gobierno Mericano pa atende e lansamento di GOES-R como invitado special November 4, 2016 na Kennedy Space Center.