“Artesania ta e ehempel bibo di un homber y hende muhe cu balor y habilidad, capaz di uni un gran variedad di expresion y recoge e sentimento di un pueblo pa medio di nan ofishi”
Departamento di Cultura Aruba conhuntamente cu e Comision di Seyo Nacional Aruba ta extende na tur artesano un invitacion pa haci entrega di tur material nobo cu NO tin Seyo ainda. Dia 13 di juli lo tuma luga nos siguiente reunion di evaluacion. Comision lo bini hunto y asina pasa riba tur e criterianan necesario pa e producto bin na remarca pa e Seyo Nacional pa Artesania di Aruba. E proceso di aplicacion ta tuma luga na Departamento di Cultura Aruba na Horizontal Building na L.G. Smith Blvd. 134 (Prome Piso). P’esaki mester yena e formulario di aplicacion, mester trece un identificacion valido, un comprobante di Censo di Awg. 5,- y un pasfoto. Pa mas informacion tocante e Seyo di Artesania Aruba, como tambe e proceso di aplicacion por fabor tuma contacto cu nos na tel.: 582-2185.
Aki e criterianan pa bini na remarca pa un Seyo Nacional di Artesania di Aruba
- Mester ta traha na man. (No cu machine, pero cu herment manual senciyo)
- Autentico, Diseño Original.
- Consistencia den (re-) produccion di diseño y modelo.
- Grado di experticio (tradicional) den trahamento di e producto.
- E producto mester ta traha na Aruba.
- Grado di uzo di material local.
- Grado cu e producto ta refleha tecnicanan di artesania tradicional
Like & Share e Facebook page di Seyo Nacional pa Artesania Aruba y haya mas informacion tocante e proyecto aki. No perde e oportunidad aki pa entrega bo producto(nan) y bo tambe por ta e siguiente artesano cu Seyo, caminda Aruba por tin tur su artesanonan cu e Seyo Nacional di Artesania y brindando nan obranan tambe den e Tienda “Cosecha”.
E Seyo Nacional di Artesania ta pa promove y certifica nos productonan local. Creatividad ta parti importante di arte. Sea abo un di e proximo artesano certifica. Departamento di Cultura Aruba ta spera cu mas y mas artesanonan ta haci uzo di e oportunidad aki.