En berdad e reunion publico a cuminsa dialuna, pa loke ta e tema di Codigo Civil. Pa loke ta e cambionan den nos Codigo Civil, e reunion a cuminsa for di mainta, caminda cu e oradornan a hiba palabra y parti atardi tabata na beurt pa e ministernan Paul Croes y Arthur Dowers duna contesta riba e preguntanan, segun presidente di Parlamento, Marisol Lopez-Tromp.
Sin embargo, loke a surgi ta cu minister Dowers a pidi mas tempo, en conexion cu e ta bisa cu tin cosnan cu e lo kier cambia den ley y tabata bisa tambe cu e lo kier bay ministerraad pa trata un ke otro. Riba esaki a propone pa sigui e reunion cu dialuna mes, mirando cu ta trata di un ley cu tin mas cu cinco aña caba ta wordo prepara door di e aparato publico y tambe un cantidad di instancia cu Parlamento a reuni cun’e den e ultimo añanan, tur instancia social, educativo, a bin Parlamento cu a duna nan deseo durante reunionnan di comision y tambe cu e minister a contesta e preguntanan, e ley ta cla pa bay den un reunion publico. Loke a sosode ta cu e minister a pidi mas tempo, fraccion di AVP a pidi cu nan kier un schorsing cu ta posibel pa mas cu algun siman of tanto dia y nan a pidi pa pospone e reunion. Di parti di fraccion di PDR tambe nan a pidi mas tempo e momento ey, pero no tin nodo di bay pa un votacion pa sigui of no cu e reunion y tambe di parti di fraccion di MEP, a bisa cu e topico ta delicado, refiriendo na e parti di amienda di Geregistreerd partnerschap di Parlamentario Desiree de Souza-Croes. Por bisa cu di parti di tur tres fraccion nan no tabata kier a sigui cu e reunion dialuna atardi. A trece dilanti, mirando cu e Codigo Civil no ta trata solamente e amienda, den e caso aki di Geregistreerd Partnerschap, pero un cantidad di topico cu pueblo tin ta warda riba dje pa añanan caba y cu Aruba ta e ultimo pais den modernisa y update esakinan, ta importante pa e debate sigui y e ministernan por contesta e preguntanan. E ora a bin un discusion, caminda cu por a sinti cu den sala di parti di tur tres fraccion, nan a desea un schorsing, e ora Lopez-Tromp a bisanan cu e fecha di e reunion lo sigui. Con cu bay bin pa ley ta wordo stipula cu ta presidente di Parlamento ta fiha fecha, ora y reunion y a trece na votacion si nan kier sigui si of no cu e reunion dialuna atardi. A resulta cu tabata tin un votacion cu 18 miembro di Parlamento a desea pa bin cu un schorsing. Nan no kier a sigui cu e reunion y Lopez-Tromp tabata e unico persona cu a vota pa e reunion continua, pero mirando cu e peticion a bin di tur tres fraccion y tambe pa e minister haya mas tempo, e ora a pone cu e reunion lo continua dialuna awo, dia 29 di Augustus, pa 10’or di mainta.
- Latest
