Dia 7 di november ultimo a tuma luga e kort geding entama pa Gina Luidens, empleado di Aruba Airport Authority, kende a haya su retiro inmediato (‘op staande voet). Esaki tabata tin di haber cu e hecho cu G. Luidens a test positivo pa droga (cocaina) realisa na pia di trabao.
Abogado mr. Falconi a entama un caso sumario pa su cliente, mientras cu Aeropuerto a wordo asesora pa abogado mr. Maura Brown. Diahuebs hues a duna su veredicto, caminda cu e ta duna aeropuerto rason, cu e droga ta legal y door di esaki, su retiro “op staande voet” ta keda vigente.
DEMANDA
Remarcabel ta cu e demandante a pidi hues pa obliga airport pa sigui pag’e su salario di september te cu awo. Tambe den su demanda e ta exigi pa e wordo tuma na trabao of un boet di mil florin pa cada dia cu keda sin cumpli cu esaki.
TEST
Di su banda, Gina Luidens ta para ariba cu e test haci door di Medworks no ta bon. Segun Luidens, lo a manipula e resultado pasobra cu despues di dicho test el a haci varios otro test y tur a sali negativo.
Luidens tabata traha como miembro di siguridad di airport y ta para ariba cu nunca el a mishi cu droga pa cual e resultado por a sali positivo.
SENTENCIA
Hues a tuma e puntonan di ambos partido na consideracion y na final, su decision ta bay na fabor di airport. Como tal, Gina Luidens lo mester core cu tur e gastonan di e caso, na un total di 1000 florin.