For di djabièrnè 28 di febrüari te ku djamars 4 di mart tabatin diferente parada en konekshon ku karnaval di Boneiru. Ta trata di 7 parada di karnaval ku a tuma lugá tantu na Playa i Rincon di respektivamente marcha di skolnan, marcha di grandinan, marcha di tener, gran marcha i marchanan di despedida. Aparte di guia e paradanan i mantené órden públiko, e aña aki riba tur e dianan, a kontrolá tur shofùr partisipante riba uzo di alkohòl i un reibeweis bálido basá riba e kategoria di e vehíkulo ku ta manehá. Esaki tabata entre otro kategoria B/E pa por ehèmpel karosa chikitu ‘aanhangwagen’ i C/E pa trèker ku ‘trailer’. Tur shofùr tabatin nan reibeweis na òrdu durante e último paradanan i tur shofùr a pasa e tèst di supla riba konsumo di alkohòl ku éksito. E tipo di kòntròlnan aki ta kontinuá den futuro.
Marcha di skol:
Un shofùr a risibí un atvertensia pa motibu ku su reibeweis a kaba di kaduká.
Marcha di grandinan:
Un shofùr a risibí un atvertensia pa motibu ku e no por a mustra su reibeweis original pero si un kopia digital.
Marcha di tener:
Polis a duna atvertensia na un stènt i un establesimentu di hóreka, ámbos riba Kaya Libertador Simon Bolivar pa benta di bebida alkohóliko den bòter di glas.
Un shofùr no por a mustra su reibeweis na e momentu ei i e grupo mester a buska un otro shofùr ku por a mustra un reibeweis na e sitio.
Marcha Grandi Rincon:
Polis a duna atvertensia na dos establesimentu di hóreka riba Bulevar Miguel Pourier pa benta di bebida alkohóliko den bòter di glas.
Tur shofùr a pasa e di dos kòntròl riba konsumo di alkohòl ku éksito.
Polisnan riba skuter a kita un skuter dor ku e shofùr tabata manehá den un kaya será, no a duna oido na òrdu di polis pa para, no tabatin un hèlm bistí, no por a mustra un reibeweis ni seguro i tampoko e skuter no tabatin un plachi di number.
Un shofùr a haña but pa manehá den un kaya será i no por a mustra un reibeweis.
Polisnan riba skuter mester a atendé ku un ‘trailer’ ku tabata toka muzik duru despues di e orario di pèrmit.
Marcha Grandi Playa:
Tabatin vários notifikashon di vehíkulonan mal stashoná ku tabata blòkia pasada di vehíkulonan òf entrada/salida di kas.
Parada despedida mucha:
No tabatin niun partikularidat.
Parada despedida grandi:
A saka un vehíkulo for di parada pa motibu ku e shofùr no por a mustra dokumentunan di seguro na e momentu ei.
Durante karnaval a kontrolá algun hóben na Kaya Caracas i a konfiská dos skèr i un kantidat chikitu di droga.
Na final di parada polis a atendé i para muzik na un ‘trailer’.
Notifikashon di bringamentu riba un sitio di stashoná na Kaya Libertador Simon Bolivar. Na yegada di polis no a topa ku bringamentu pero a kita tur hende for di e sitio.
Durante tur e marchanan tras di lomba polis ta sigui konstatá ku stashonamentu tras di barikada òf habrimentu di barikada durante orario di karnaval ta keda un problema i ku tur peliger ku esaki por trese kuné riba e ruta di karnaval. A hala atenshon i saka diferente shofùr ku nan vehíkulo for di e ruta di karnaval.
KPCN ta sigui konta ku koperashon di pueblo durante eventonan grandi. Huntu nos ta traha na un sosiedat mas seif.
