RESUMEN DI SIMAN DI PROME MINISTER EVELYN WEVER-CROES
Den e siman tras di lomba Premier Evelyn Wever-Croes y Minister di Husticia Andin Bikker a duna un conferencia di prensa di un ora tocante Venezuela y asilo politico y a contesta hopi pregunta riba e topico aki. Gobierno ta pidi tur hende pa no bay den panico, pa keda cabes trankil pa asina Gobierno por tin espacio pa atende cu tur e retonan di e crisis aki. Tambe Gobierno a pidi pa no crea odio pasobra nos ta un pueblo cordial y di bon curason. Gobierno tin e retonan aki di asilo bou control. Gobierno tin e proceduranan ‘in place’ y ta ganando e casonan den Corte.
Premier a reuni tambe cu General de Vin di Marina Real pa intensiva e cooperacion y e esfuersonan pa tene nos costanan miho proteha. Nos ta prepara pa cualkier eventualidad.
Pa loke ta e refineria Premier a anuncia un biahe pa Washington hunto cu premier di Corsou, pa atende e tema di Refineria na e nivelnan di Gobierno y Congreso Mericano. Esaki lo tuma luga otro siman dialuna.
Samira Rafaela, candidato nr. 3 riba lista di D66 pa eleccion di Parlamento Europeo, tabata na Aruba den cuadro di su campaña y a reuni cu Premier Evelyn Wever-Croes. Samira kier representa Reino den Parlamento Europeo. Pa por haci esaki miho posibel a bin bishita nos pais y tene varios reunionnan pa haya un miho bista con Aruba ta. Nos ta desea Samira hopi exito den eleccion fin di e luna aki.
Premier Evelyn Wever-Croes y Minister di Husticia Andin Bikker a continua cu reunionnan cu sindicatonan TOPA, SADA, SPA, SIMAR y SEPPA riba diferente tema. Reunion a bay den bon ambiente y lo continua proximamente.
Premier Evelyn Wever-Croes a reuni cu SKOA riba diferente desaroyo den enseñansa. SDG # 4, meta nr 4 di Nacionan Uni, ta stipula cu mester por brinda enseñansa di calidad na nos mucha y hobennan. SKOA ta hunga un papel importante akinan.
Tambe Premier Evelyn Wever-Croes a reuni cu cabesante y docentenan di Prinses Amalia Basisschool riba un proyecto hopi innovativo den enseñansa. E ekipo di Prinses Amalia Basisschool ta hopi motiva. Premier Evelyn Wever-Croes ta kere den innovacion den enseñansa y e proyecto aki ta un bon ehempel. Pronto lo duna mas informacion.
Premier Evelyn Wever-Croes a presenta e proyecto “From Good to Great”, un proyecto cu e ta carga hunto cu Minister Glenbert Croes y Minister Rudy Lampe. Un proyecto pa guia nos hobennan, y motiva nan pa nan ta exitoso den bida. Den e prome 6 luna di e proyecto 250 alumno di 9 scol a participa y den e siguiente 6 luna nos lo inclui 250 hoben mas.
Premier Evelyn Wever-Croes a ricibi di Columbia University un presentacion di resultadonan di e investigacion di e ‘Capstone Project’ di FreeZone. Na september aña pasa Premier a cera un acuerdo cu Columbia University cu dos grupo di studiante pa nan tesis y investigacion final di nan estudio lo presenta sugerencianan cu ta trece actividad den Free Zone. E prome investigacion a keda cla y a traves di un video conference a presenta esaki. Un proyecto innovativo pa stimula e sector aki y si e ta exitoso, lo genera hopi entrada pa Aruba y cupo di empleo nobo, cu lo wordo presenta pronto na comunidad. E ta producto di e tesis di graduacion di estudio master di studiantenan cu no a costa Aruba nada.
Premier Evelyn Wever-Croes ta sigui cu esfuerso pa trece bida bek den centro di Oranjestad y San Nicolas. A reuni cu sr. Eugene Wilson di AREA riba e plannan di e taskforce di Playa y San Nicolas pa riba termino corto trece bida bek, mientras ta trahando riba e plannan strategico riba termino mas largo. Hopi bon ideanan ta wordo presenta pa ambos Taskforce y nan por conta cu sosten total di Gobierno.
Esfuersonan di Gobierno pa sigui ataca abuso sexual di mucha ta continua. Premier Evelyn Wever-Croes a reuni cu sra. Lisette Gomez y su comision cu tin mas di 10 aña ta lucha riba e tereno aki. Sra Lisette Gomez a presenta na Premier e diferente rapportnan cu el a entrega den pasado na Gobierno anterior pero cu e Gobierno aki nunca a ricibi pa motibo cu no tabata tin traspaso debido di informacion. Premier Evelyn Wever-Croes lo traha hopi di cerca cu sra. Lisette Gomez riba e problema serio di abuso sexual di mucha. Hunto lo traha riba prevencion y riba e castigonan mas halto. Un mucha merece di wordo stima y protehi pa un adulto, y no pa wordo abusa.