Aki ta sigui un resumen di e casonan den Corte di Prome Instancia pa dia 16 di Juni, 2017.
Pa 8 or y 15, e sospechoso G.N.A.J.E. lo presenta dilanti hues, Pro forma. E. ta wordo acusa di, conhuntamente cu un otro of otronan, a mata un persona riba 24 di April 2016, dor di tire varios biaha cu un arma di candela na su cabez y nek, durante, despues of prome di ladronicia cu violencia di un suma di placa y droga.
Pa 8 or y 15, e sospechoso M.E.G. lo presenta dilanti di hues, Pro forma. G. ta wordo acusa di a intencionalmente pega auto di hende na candela riba 26 di februari 2017. E ta wordo acusa di kiebro y ladronicia den un cas riba 12 di Februari 2017 di dos brommer di un persona.
Pa 8 or y 30, e sospechoso N.D.P. P. ta wordo acusa di ladronicia di un iPad y mas propiedadnan di un persona riba 14 di Februari 2017. Corte lo trata ademas ehecucion di un castigo condicional pendiente.
Pa 9 or, e sospechosonan M.S.R., S.C.P.K., A.R.M. lo presenta dilanti di hues. R., K. y M. ta wordo acusa di, conhuntamente cu un otro of otronan y cu e intencion di tuma bida di un persona, a los tiro di e persona aki riba 14 di Oktober 2016. K. ta wordo acusa di posesion di hennep riba 20 di augustus 2016.
Pa 11 or, e sospechoso E.A.D.S., O.R.M.D., lo presenta dilanti di hues. D.S. y M.D. ta wordo acusa di a viola ley di droga riba 28 di December 2016.