Diadomingo ultimo 2 di Juli piscadonan di henter Aruba a celebra dia di piscado grandemente. E di 24 edicion di e celebracion anual tabata yena di bon ambiente canto di lama na e pier di Centro di Pesca Hadicurari, unda 8 tent a ofrece un setting cozy cu musica crioyo, festival di cuminda di lama y hopi pisca fresco pa publico cumpra. For di oranan di marduga diadomingo, un cantidad record di 42 boto inscribi, a sali pisca awanan rond di Aruba. Pa 3’or di atardi un total di 23 boto a pisa un 994.7 Kilo di pisa oficialmente na final di e torneo, apesar di condicionnan di tempo menos cu ideal cu un biento poco mas duro cu normal.
DIA DI FAMIA:
Na tera tabata tin varios tent organisa door di Santa Rosa ofreciendo cuminda di lama den un ambiente fenomenal cu banda tipico crioyo tocando for di 11’or di mainta te despues di 6’or ora solo a baha. Publico presente a goza enormemente, sinta den sombra ta mira botonan drenta y pisa piscanan di tur tipo. Muchanan a landa y mas cu tur e ambiente di famia di e cultura di piscado a resalta.
RECONOCIMENTO DI BALUARTE PABLO ERASMUS:
Durante e evento di premiacion a duna reconocimento ta sr. Pablo Erasmos como un baluarte di piscamento. Sr. Pablo Erasmus ta un piscado di hopi aña cu ta mara na Hadicurari y cu ta un ehempel pa varios piscado rond na e centro. Centro di Pesca Hadicurari tin un aprecio special pa sr. Erasmus kende riba su propio iniciativa y propio gasto tin ora ta yuda cu material y ekiponan comun di e centro y piscadonan.
WASA RECORD GARA:
Un publico enorme, incluyendo hopi turista a aglomera pa mira e pisamento di gran cantidad di pisca. Dado momento un consternacion grandi a lanta un y tur pa mira un boto ta lastrando un enorme animal mara su tras. Tabata e boto Ayiana cu a gara un Wasa of Djampou preto asina grandi cu nan no por a hise abordo. A tuma un esfuerso grandi pa lastra e pisca gigante pone bou di e tent di pesahe. Unabes cu a logra haya un balansa pa pisa e ehemplar aki di capitan Randy Paskel y Rivelino Kelly, el a marca un record pa e especie aki na e centro aki su torneo na 168 kilo cu a bay cu e premio pa mayor ehemplar djampou y tambe mayor ehemplar di e torneo.
GANADORNAN DI CATEGORIA OPEN:
Na di tres luga a keda e boto Pochito di Capitan Mik Carolina cu 86.5 kilo. Na di dos luga a keda e boto Ayiana di Capitan Randy Paskel cu un solo pisca marcando 168 kilo. Na prome lugar den e categoria Open a keda den nomber di e boto Tonino di Capitan Leo Briesen cu 219.1 kilo marca riba balansa y cu 5 enorme Brasi. Tonino ademas a bay tambe cu e pot di 10 boto cu a participa den esaki.
GANADORAN DI CATEGORIA TRADICIONAL/CRIOYO:
Di tres luga a bay pa e boto Shasha di Capitan Aegidio Kelly cu 28 kilo. E di dos luga a bay pa e boto Zennia di Capitan Ronny Tromp cu a marca e balansa na 36 kilo.
Ganador absoluto den categoria di boto chikito y piscando na man, tabata pa e boto Joanne di Capitan Omar Andrade cu 82.5 kilo gara den e torneo. Adicionalmente e boto Joanne a bay cu e pot den cual 7 boto a participa.
E premio estimulo pa e boto crioyo cu mas kilahe a bay pa e Shaustienne di Capitan Jacintho Kelly.
MAYOR EHEMPLAR:
Pishiporco mas grandi tabata pa e boto Tonino di Capitan Leo Briesen cu un ehenplar Pishiporco di 3 kilo. E boto Tonino a bay tambe cu mayor ehemplar Brasi pisando 36 kilo y e mayor ehemplar Dorado cu un ehemplar di 4.6 kilo. E pargo cora mas grandi di e torneo tabata un Pisca cora di 4.7 kilo gara door di e boto Shaustienne di Capitan Jacinto Kelly. Picuda mas grandi a bay pa e boto Roya Blue di Capitan Jimmy Marin cu un Picuda di 2.5 Kilo. E mayor ehemplar Carpitan tabata di e boto Pochito cu a pisa 4.6 kilo. E mayor ehemplar mas grandi di Conofes a bay, pa di tres aña consecutivo pa e boto Shakim di Capitan Raul Croes, pisando 3.5 kilo.
Mayor ehemplar di e torneo y mayor ehemplar Djampou a bay pa boto Ayiana di Randy Paskel.
GRADICIMENTO:
Organisadornan ta gradici tur piscado cu a participa, tur voluntario y e patrocinadornan pa nan contribucion. E exito di e torneo y dia di famia ta mustra un biaha mas cu piscamento ta parti integral di cultura di Aruba. Ta felicita tur e ganadonan y ta mira dilanti pa proximo torneonan cu gran entusiasmo.