Den e Asamblea General di Fondo Di Pension di Sector Turistico, Sr. Laurens Keesen, actuaris di Corsou a splica cu den su bista e fondo di Fondo Di Pensioen di Sector Turistico ta hopi positivo.
E resultadonan di e fondo ta uno hopi positivo, caminda nan por duna 4% riba nan capital, cual ta miho cu un banco. Y 4% ta un bon resultado. Algo cu tambe ta hopi importante ta si grado di cobertura ta bon. Esaki kiermen, cu nan tin un tiki mas cu loke nan mester eigenlijk. Pasobra cu e ta net e placa cu nan mester y nan tin esaki, y si algo pasa, nan tin problema. E ora nan mester tin algo extra, ya cu Banco Central ta regla esaki, y nan tin basta extra. Nan grado di cobertura ta bon. Y el a subi delaster añanan y e fondo ta duna 4% na e miembronan.
E ley cu gobierno a pasa pa haci pensioen obligatorio, ta uno cu e yuda e fondo den e ultimo añanan, ya cu segun Sr. Laurens, e placa cu e fondo tin a dobla den e ultimo 5 añanan. Esaki ta yuda e fondo, ya cu si bo ta mas grandi, e gastonan ta baha pa e miembronan. Y bo por inverti hopi mas miho y esaki a yuda e fondo hopi bon. Na opinion di Sr. Keesen, e no ta facil pa maneha un fondo awendia, ya cu ta kita 6% di nan salario. Tin hende ainda ta pensa cu ainda nan lo ricibi 70% di nan ultimo salario, cual no ta corecto. Pa bo haya un tiki mas, bo lo mester spaar tambe un tiki mas, segun Sr. Keesen.
Si mira otro paisnan, manera na Hulanda, cu tin hopi fondonan di pensioen cu ta den problema. Nan grado di cobertura ta bou di 100% y nan mester baha nan pensioen. Fondo di Pensioen di Sector Turistico ta bayendo hopi mas miho cu na Hulanda. E motibo di esaki ta cu e interes na Europa y na Merca ta hopi abao. Aki tambe e ta abao, pero aki e ta mas halto toch compara cu Merca y Europa.
Sr. Laurens Keesen ta compara Aruba mirando cu nos edad di pension ta 65 aña, y te ainda 65 aña ta bon, pero si bo ta bay wak cu hende ta biba mas largo cu aworaki, e ta bira inevitabel tambe pa subi e edad di pensioen. Si un hende ta biba mas largo, e tin cu paga mas tambe. Si un hende ta biba mas largo, logicamente e edad tambe ta bay subi. Te cu aworaki, 65 aña ta un bon edad y pa Corsou tambe e ta na 65 aña. St. Maarten te ainda e edad di pensioen ta na 62 aña pero nan ta bezig ta wak si lo mester subi esaki. Lo miho ta pa no subi e edad di pensioen despues di 65 aña. Manera cu e ta, e ta bon, segun Sr. Laurens Keesens, actuaris di e Fondo di Pensioen di Sector Turistico.