Best of the Best Taekwondo Cup 2016 a pasa tur e expectativanan e aña aki na unda cu tabata tin atletanan di taya cu a participa na Best of the Best Taekwondo Cup 2016.
Un evento cu tabata tin 28 pelea for di infantil te cu senior. Aruba tabata bon representa cu participantenan for di Noord Taekwondo Center, San Nicolas Taekwondo Center y Brazil Taekwondo Stichting.
Manera tabata plania a cuminsa cu e evento pa 7’or y 15 y e dos refereenan internacional a para pa e 28 peleanan. Den infantil tabata tin varios pelea y e publico presente por a mira con nos atletanan infantil a bringa. Aruba tin bon atleta pa futuro den infantil si nan sigui e caminda aki. Cadet y Junior tabata e Talk of the Town, e atletanan di Aruba a mustra nan explosividad den nan peleanan. Aki por a mira bon cu bringando internacional ta duna su fruto. Surinam y Corsou a bin e biaha aki bon prepara, pero a wordo para na caminda y despues a laga e Venezolanonan atras. Venezuela a gana algun pelea y por bisa cu nan tambe ta na caminda. Un danki ta bay na tur e medionan di prensa cu a presencia un anochi hopi plasentero na unda cu nan por a graba y saca potret di nos atletanan.
Dr. Guaicaipuro Jimenez Presidente di Aruba Taekwondo Bond tabata hopi contento cu e participacion di e atletanan di Aruba na unda cu por a mira un Taekwondo old school style.