Parlamentario Setty Christiaans-Yarzagaray a elabora riba un publicacion cu a sali recien di Banco Central relatando cifranan di e sector di Gobierno te cu di dos kwartaal di 2018. Por a nota un resultado positivo entre entrada y gasto riba base di kwartaal despues di hopi tempo tanto den di 2 kwartaal di 2018 como den di 4 kwartaal di 2017 te cu awor. Mester remarca akinan cu mester corda cu Gobierno di Aruba a introduci crisisheffing na juli 2018, cu a cay net despues di e di 2 kwartaal.
E publicacion cu e Parlamentario ta referi na dje “Statistical Tables Government Sector” di kwartaal 2 di 2018 cu ta presenta datonan di 2015 pa 2018 pero tambe a tuma nota di publicacionnan den pasado pa observa e tendencia den pasado te cu aña 2013. Den e informacionnan presenta por haya un bista di entrada menos gasto si berdad ta resulta den un deficit financiero. Ora tin mas gasto cu entrada logicamente ta resulta den un deficit.
Parlamentario Christiaans-Yarzagaray a indica cu den e di dos kwartal di 2018, esaki ta prome biaha cu tin un resultado positivo asina significante di 40.6 miyon florin. Esaki logicamente ta mustra un bon stap den e bon direccion pa pais Aruba. Pa varios aña, den relatonan similar di Banco Central ta resultadonan negativo so tawata tin cu ta significa un registracion di un deficit cada bes. Esaki ta e resultado ora aña tras di aña tawata tin mas gasto cu entrada. Hasta por remarca cu tawatin deficitnan financiero registra per kwartaal den e añanan di e gobernacion anterior cu ta considera di ta barbaro. Pa cua motibo tambe mester a fia basta placa pa financia e diferencia aki den corto tempo, redoblando asina casi e debe di Aruba den apenas 5 aña.
Una bes cu cuminsa mira resultadonan positivo, lo no bay tin mester di fia placa mas pa financia e deficit crea cada bes. Di otro banda, asina lo cumpli tambe cu locual a priminti CAFT, di bay bek den e direccion di un finansas publico sano y duradero na unda cu pais Aruba lo cuminsa paga su debe cu e resultado positivonan aki y di e manera ey cuminsa reduci e debe.
Parlamentario Christiaans-Yarzagaray a expresa di ta contento cu e resultado den e prome kwartal di 2018 ta positivo despues di hopi aña. Comparando cu e consumidor su expectativa y confiansa basa riba e Consumer Confidence Survey cu e cifra di e di dos kwartaal di 2018 pa loke ta trata e secor di gobierno su finansas, por realisa cu esaki ta un stap den e bon direccion.