El a bataya den e grandi nan, pa ser exacto den e top 10 nan di mundo cu ta presente aki na Aruba pa loke ta e Aruba Beach Tennis Open 2016 cu ta tumando lugar na Eagle Beach Aruba. Aki nos ta papia di Aksel Samardzic di Aruba, kende a hunga e final den e categoria Pro Singles masculino, contra su partner den doubles cual ta Vini Font di Brazil pero a cay venci den tiebreak, cual el a perde cu e score di 9-7, dus un score basta preta. Un publico hopi grandi mes tabata presente pa a presencia e wega aki cu a caba 11:30 di anochi. Pero mi ta sigur cu nan no tabata tin niun problema cu e orario paso loke nan a experencia ta algo nunca antes bisto na Aruba. E prome Arubiano cu ta yega un final den e campeonato internacional aki.
Pa loke ta e categoria si Pro Singles femenino, nos a presencia un final entre un dama di Italia, Eva D’Elia kende ta number 1 di mundo riba e ranking mundial contra e Ruso Irina Glimakova cu ta e number 11 di mundo a sali victorioso despues un wega di calidad super halto. E tabata un satisfaccion pa wak con el a celebra su truimfo, riba center court, cu un tribuna completamente yen.
E wega nan ta sigui te diadomingo awo, 20 November 2016, cuminsando pa 9or di mainta y ta termina te 10or di anochi. Henter e siman lo por presencia un total di 1200 participante, 32 pais, cu lo competi pa wak ken ta bay cu e premio di mas grandi. Un premio total di 40 mil dollar pa reparti den diferente categoria. Nos ta haci un invitation un biaha mas pa henter Aruba pa pasa na Eagle Beach.