Respaldo su empleadonan ta e alma, curason y rosea di e organisacion, pa e motibo aki Respaldo ta pone enfasis den inverti den nan.
Respaldo ta contento di por anuncia cu recientemente tur su empleadonan a ricibi cursonan di ‘Bedrijfshulpverlening’. Awor tur empleado ta certifica pa por hasi First aid, CPR y AED. Tambe nan a ricibi training pa evacua den caso di calamidad como tambe con pa actua den caso di candela.
E empleadonan tambe a ricibi training pa e sistema di “Elektronisch Patiënten Dossier” (EPD). E programa di EPD ta esencial pa e cuido ya cu e ta duna acceso na tur informacion necesario di e cliente. Esaki ta contribui na un calidad di cuido mas halto y un miho tratamento pa e cliente.
Ademas di ofrece curso y training pa empleadonan conhuntamente, tambe ta stimula e desaroyo individual di e empleadonan. Awe Respaldo kier felicita dos di su empleadonan cu a logra nan certificado.
Recientemente nos secretaria medico, sra. Natasha Engelhart, a ricibi su certificado como ‘Ervaringsdeskundige’.
Un ‘ervaringsdeskundige’ ta un persona cu tin experiencia cu un problema, reto of situacion specifico. E persona aki a pasa door di experiencianan y a siña con pa manehanan y superanan, hopi biaha door di crecemento personal, procesonan di restoracion of otro forma di desaroyo personal. E ‘ervaringsdeskundige’ por contribui na mehoracion di e cuido y sosten door di e perspectiva unico cu nan por ofrece basa riba nan experiencia propio. E curso a wordo organisa door di Projectbureau Caribbean’ di Curaçao y ofreci door di Hogeschool Windesheim di Hulanda.
Un otro colega cu recientemente a logra un certificado ta nos psicologo Phil Godoy. Phil a logra su certificado den e estudio di ‘Multi Dimensionele Familie Therapie’ (MDFT). E estudio a wordo facilita door di ‘Stichting Jeugdinterventies’ den cooperacion cu Ministerio di Husticia y Asuntonan Social y Ministerio Publico. Mirando e problematica complica di hobennan na Aruba, a bin cu e metodo di terapia multi-dimensional di famia como alternativa pa haci un diferencia pa e famianan aki. E ta un metodo intensivo cu tin como meta pa reduci criminalidad, bringa criminalidad, evita pa e echonan ripiti (recidive) y percura pa drecha e relacionnan den sistema di famia.
Respaldo tin e idealismo cu inverti den e desaroyo di su empleadonan, ta un inversion na e exito di e organisacion a largo plaso. Respaldo ta comprometi pa yuda su empleadonan den cada stap di nan carera profecional y sigura cu nan tin tur herment pa logra nan metanan.
Respaldo ta sigui comprometi pa promove un ambiente laboral unda cu tur hende por sigui desaroya nan mes y asina construi un ekipo mas solido y miho prepara pa e futuro di e organisacion.
Respaldo ta invita comunidad di Aruba pa bishita nan website www.respaldo.aw pa cuakier informacion tocante e organisacion, tambe por bishita nos pagina di Facebook RespaldoAruba.
Rumbo pa un organisacion di salud mental specialisa profesional y sostenible pa un Aruba mentalmente sano.
