Rofino Ruiz, e Resort Assistant Manager tan stima di Hilton Aruba Caribbean Resort & Casino recientemente a wordo reconoci pa Hilton pa a ser nomina pa e COE Light & Warmth Award, e honor mas halto cu cualkier miembro di ekipo di Hilton por ricibi.
Cu casi 700 nominacion den full e cadena di Hilton y solamente 13 ta haya homenahe, Rofino Ruiz mihor conoci como Rufo, awo ta parti di e grupo special di miembro di ekipo cu a ser nomina pa e COE Light & Warmth Award.
E nominacion di Rufo ta consisti di un carta di cuatro pagina caminda su contribucionnan ta wordo resumi, pa duna un ehempel di profesionalismo y servicio consistentemente. Den su posicion como Resort Assistant Manager durante atardi te cu anochi laat, Rufo hopi biaha ta haya su mes mei mei di un crisis di salud, yuda huespednan enfrenta circumstancianan imprevisto, bishita na dokter, hospital y tambe botica, deal cu problema di reaccionnan alergico, y controla e nivel di musica di clubnan nocturno den becindario. Rufo ta zorg pa tur situacion y ta sigura cu tur problema wordo resolvi satisfactoriamente prome cu e caba su shift mainta trempan.
“Den tur mi añanan trahando den hospitalidad, ainda mi tin cu topa cu un hende cu mesun hopi pasion, atencion y sentido di hospitalidad sincero manera Rufo”, Jacques Monteil, Hotel Manager, a bisa. “E ta e rason cu nos tur por drumi bon anochi y tin e seguridad cu e hotel ta wordo bon cuida”. Su honestidad, sinceridad y integridad ta conoci pa tur hende – miembronan di ekipo y socionan di e industria pafor di hotel. Ora bo duna Rufo un tarea, bo ta garantisa cu e ta cumpli na tempo y di e mihor manera posibel”.
Rufo, e hotel su Night Manager desde decada 80, ta laga un impacto inspirador riba cada huesped cu e topa. Bishitantenan ta hopi agradecido pa e participacion y disponibilidad di Rufo, y como resultado frecuentemente nan ta publica comentario y opinion tocante e actitud amabel y amistoso di Rufo.
Un review recien di 5 strea di TripAdvisor ta bisa lo siguiente: “Principalmente, loke a ponemi skibi e review akinan tabata e servicio y atencion excepcional cu nos a ricibi di e night manager Rofino Ruiz, kende personalmente a hiba nos y compaña nos na e sala di emergencia y e botica mas cerca riba un diadomingo mainta trempan. Danki na Hilton pa contrata un manager asina excepcional cu ta haci tur lo posibel pa su huespednan”.
Pone e huespednan sinti na cas y bon cuida ta e specialidad di Rufo, tur esaki mientras e ta sigui e balornan di Hilton, haciendo un impacto y contagia otro cu e luz y e calor di hospitalidad tur dia.
Pabien Rufo, bo coleganan di Hilton Aruba y Aruba en general ta orguyoso dibo y di bo reconocimentonan mereci.