Reservanan internacional ta na nivel adecua

Durante e reunion di 2 di maart 2021 y despues di a revisa e dato economico y monetario mas recien, e Comite di Maneho Monetario (CMM) di Banco Central di Aruba (BCA) a dicidi pa mantene e porcentahe actual di e tasa di e “reserve requirement” (reserva rekeri) na 7,0 porciento. E tasa di e reserva rekeri ta e cantidad minimo di reserva cu banconan comercial mester mantene na BCA y ta igual na 7,0 porciento di nan obligacionnan cu ta vence den menos di 2 aña. A considera e siguiente informacion y analisis pa yega na e decision aki.

Reservanan internacional
E reservanan internacional (incluyendo e diferencia di revaluacion di oro y reserva di divisa) a aumenta cu Afl. 47.7 miyon te cu y incluyendo 12 di februari 2021, compara cu fin di december 2020. E aumento aki tabata debi na fiansa di gobierno ricibi for di exterior durante e prome luna di e aña y entradanan relata na turismo y otro fiansanan di exterior. Reservanan oficial di divisa a nota un caida di Afl. 9.1 miyon. Consecuentemente, e reservanan oficial y e reservanan internacional a crece te na, respectivamente, Afl. 2.198,8 miyon y Afl. 2.404,3 miyon riba 12 di februari 2021. Di e manera aki e reservanan a keda na un nivel adecua ora di compara nan cu e nivel critico di 3 luna di pago registra ariba cuenta coriente y e metrico di ARA di IMF (Grafico 1).

Graifico 1 – Reservanan

Desaroyonan den credito
Den januari 2021, credito total a subi cu Afl. 18,0 miyon of 0,5 porciento compara cu fin di 2020. Esaki tabata relaciona principalmente cu e componente “fiansa na empresa” cu a nota un expansion di Afl. 27,5 miyon (+1,8 porciento), door cu e demanda pa credito ariba cuentenan coriente a aumenta. Contrariamente, e componentenan “otro” y “fiansa na individuo” a contribui negativamente na e credito total. E componente “fiansa na individuo” a baha primeramente a causa di un caida den credito na consumidor (-0,9 porciento) como tambe den hipoteca pa cas (-0,1 porciento). Remarcabel ta cu hipoteca pa cas a baha pa prome biaha desde januari 2017.

Inflacion
Inflacion, basa riba CPI, tabata 2,7 porciento mas abou na januari 2021 compara cu e mesun luna di e aña anterior (Grafico 2). Esaki tabata primordialmente causa pa prijsnan mas abou den e categorianan “operacion di vivienda” y “transporte”. E promedio di inflacion di 12 luna a baha te na -1,8 porciento na januari 2021. E promedio di inflacion di 12 luna, excluyendo e componentenan di energia y cuminda, tabata -0,4 porciento na januari 2021.

Grafico 2 – Inflacion

Likides prudencial
E likides prudencial di e banconan comercial (33,5 porciento), cual ta midi e cantidad di activo likido compara cu e activo total netto di e banconan comercial, a keda na un nivel comfortabel den januari 2021, compara cu e likides minimo rekeri di 15,0 porciento.

Comments

comments