Durante e reunion di 13 di november 2020 y despues di a revisa e dato economico y monetario mas recien, e Comite di Maneho Monetario (CMM) di Banco Central di Aruba (BCA) a dicidi pa mantene e porcentahe actual di e tasa di e “reserve requirement” (reserva rekeri) na 7,0 porciento. E tasa di e reserva rekeri ta e cantidad minimo di reserva cu banconan comercial mester mantene na BCA y ta igual na 7,0 porciento di nan obligacionnan cu ta vence den menos di 2 aña. A considera e siguiente informacion y analisis pa yega na e decision aki.
Reservanan internacional
E reservanan internacional (incluyendo e diferencia di revaluacion di oro y reserva di divisa) a aumenta cu Afl. 285,0 miyon te cu y incluyendo oktober 2020, compara cu fin di december 2019. E aumento aki tabata debi na un bahada fuerte den importacion causa pa menos demanda di turismo y local, fiansa di gobierno ricibi for di exterior, medidanan di divisa tuma door di BCA y revaluacion di e reserva di oro di BCA causa pa subida den prijs di oro riba mercado internacional. Reservanan oficial di divisa a nota un subida di Afl. 345,6 miyon. Consecuentemente, e reservanan oficial y e reservanan internacional a crece te na, respectivamente, Afl. 2.110,3 miyon y Afl. 2.184,5 miyon riba na final di oktober 2020. Di e manera aki e nivel di reservanan ta permanece adecua ora di compara nan cu e nivel critico di pago pa importacion ariba cuenta coriente y e metrico di ARA, di IMF (Grafico 1). Na final di oktober 2020 e reservanan internacional tabata cubri 9,1 luna di pago pa importacion ariba cuenta coriente, mientras cu e nivel di reservanan oficial a yega 106,6 porciento di e metrico di ARA.
Graifico 1 – Reservanan
Desaroyonan den credito
Den september 2020, credito total a subi cu Afl. 62,6 miyon of 1,6 porciento, compara cu fin di 2019. Esaki tabata relaciona principalmente cu e componente “fiansa na empresa”, cu a nota un expansion di Afl. 38,4 miyon (+2,5 porciento). Tambe, e componente “fiansa na individuonan”, a contribui na e subida den credito total (+Afl. 33,2 miyon/+1,7 porciento). Contrariamente, e componente “otro” a baha cu Afl. 9,0 miyon (-1,6 porciento), locual ta e resultado di bono di gobierno manteni den portofolio di banconan comercial cu a vence.
Inflacion
Inflacion, basa riba CPI, tabata 0,9 porciento na september 2020 compara cu e mesun luna di e aña anterior (Grafico 2). Esaki tabata primordialmente causa pa e componente ‘recreacion y cultura’. E promedio di inflacion di 12 luna a baha te na 2,7 porciento na september 2020, compara cu e nivel halto di 4,6 porciento cu el a yega na februari y maart 2020. E deceleracion den e promedio di inflacion di 12 luna ta debi na e contribucion mas chikito di e componente di cuminda y energia. E expectativa ta cu e promedio di inflacion di 12 luna lo sigui baha den e resto di aña, debi na un reduccion den tarifa di coriente desde 1 di januari 2020, asumiendo un prijs mas abou y stabil di crudo como tambe ningun aumento di impuesto. E promedio di inflacion di 12 luna, excluiendo e componentenan di energia y cuminda, tabata 3,0 porciento na september 2020.
Grafico 2 – Inflacion
Likides prudencial
E likides prudencial di banconan comercial (31,3 porciento), cual ta midi e cantidad di activo likido compara cu e activo total netto total di e banconan comercial, a keda na un nivel hopi adecua den september 2020, compara cu e likides minimo rekeri di 15,0 porciento.