Desaroyo monetario
Den e luna di februari 2018, e cantidad di placa den circulacion a expande cu Afl. 49,1 miyon te na Afl. 4.332,6 miyon, compara cu januari 2018. Esaki a resulta for di subidanan den tanto e activo domestico netto (+Afl. 23,5 miyon) como e reserva di divisa netto (+Afl. 25,6 miyon). E aumento den e activo domestico netto a wordo causa pa un aumento den credito domestico (+Afl. 51,2 miyon) y un bahada den transaccionnan no relata na credito (-Afl. 27,7 miyon).
E crecemento den credito domestico a resulta for di subidanan den tanto credito bancario netto na e sector publico (+Afl. 37,1 miyon), principalmente causa pa un bahada den depositonan di gobierno (-Afl. 41,9 miyon), y den credito bancario na e sector priva (+Afl. 14,1 miyon), debi na mas credito na empresa (+Afl. 8,4 miyon) y hipoteca pa vivienda (+Afl. 8,0 miyon), y un bahada den credito na consumidor (-Afl. 2,4 miyon).
E subida den e reserva di divisa netto di e sector bancario a resulta for di compra netto di divisa for di publico (+Afl. 233,0 miyon), primordialmente relaciona cu entrada for di turismo. Esaki a wordo pa un gran parti mitiga pa benta netto di divisa na publico (-Afl. 207,4 miyon), relaciona cu importacion di mercancia y transferencia netto pa cuentanan den exterior di companianan local.
Inflacion
E nivel general di prijs, cu ta wordo midi door di e indice di prijs di consumo, a registra un subida di 1,9 porciento den e luna di februari 2018, compara cu februari 2017. E contribuyentenan principal na e aumento aki ta e componentenan “Transporte” y “Cuminda y Bebida No-Alcoholico”. Si exclui e componentenan di cuminda y energia for di e indice di prijs di consumo, inflacion a mustra un aumento di 0,9 porciento compara cu februari 2017. Pa loke ta trata e promedio anual di e tasa di inflacion, esaki a regsistra un bahada di 0,2 porciento na februari 2018, compara cu un caida di 0,4 porciento na januari 2018.
Turismo
Na februari 2018, e cantidad di turista a registra 85.017 bishitante, cual ta 854 bishitante (+1,0 porciento) mas cu na februari 2017. E crecemento aki a resulta principalmente door di un expansion den e mercado Norte Americano, door di mas bishitante for di Merca (+4.251 bishitante of +7,5 porciento). Esaki a wordo pa un gran parti mitiga pa un reduccion den e mercado Latino Americano causa primordialmente pa menos bishitante for di Venezuela (-4.098 bishitante of -75,6 porciento).
E cantidad di turista crucero a registra un aumento di 7.883 bishitante of 8,6 porciento te na 99.303 bishitante na februari 2018, compara cu februari 2017. E cantidad di barconan a expande for di 38 na februari 2017 pa 41 na februari 2018.
Entrada di Gobierno
Na februari 2018, entrada di gobierno a suma Afl. 79,8 miyon, cual ta Afl. 12,5 miyon mas compara cu e mesun luna di e aña anterior. Esaki a resulta for di un aumento den entrada di impuesto (+Afl. 13,0 miyon) y un caida den entrada no relata na impuesto (-Afl. 0,5 miyon).
E subida den entrada di impuesto ta relata principalmente na mas entrada for di accijns riba gasolin (+Afl. 5,2 miyon), impuesto riba salario (+Afl. 3,1 miyon), impuesto riba importacion (+Afl. 1,9 miyon) y benta di negoshi (B.B.O.) (+Afl. 1,5 miyon). E subidanan aki a wordo parcialmente mitiga pa menos entrada for di impuesto riba vehiculo di motor (-Afl. 1,9 miyon).
Banco Central di Aruba
10 juli 2018