Durante e reunion di dia 21 di september 2018, e Comite di Maneho Monetario (CMM) di Banco Central di Aruba (BCA) a dicidi pa mantene e porcentahe actual di e tasa di e “reserve requirement” na 11,0 porciento y e “advance rate” na 1 porciento, despues di a evalua e datonan economico y monetario mas recien. E siguiente informacion y analisis a wordo considera pa yega na e decision aki, basa riba data di juli 2018.
Reservanan internacional
Tanto e reservanan internacional di divisa (+1,8 porciento), cual ta consisti di e divisanan di banconan comercial y BCA, como e reservanan oficial di divisa (+3,0 porciento), esta e divisanan cu ta di BCA so, a registra aumento den juli 2018, compara cu december 2017. Consecuentemente, e reservanan internacional di divisa y e reservanan oficial, respectivamente, a yega te na Afl. 1.857,9 miyon y Afl. 1.698,1 miyon na fin di juli 2018.
Desaroyonan den credito
E crecemento di credito total den e sector bancario a keda positivo (+1,9 porciento) na juli 2018, compara cu december 2017. E desaroyo aki ta principalmente atribui na aumentonan den fiansa pa construccion di cas, hipoteca pa negoshi y credito ariba cuentanan coriente.
Inflacion
E promedio anual di inflacion a crece te na 1,3 porciento na juli 2018 for di −0,4 porciento na juli 2017, principalmente causa door di un aumento den e componentenan di transporte, cuminda y recreacion y cultura. E promedio di inflacion ora exclui e componentenan di energia y cuminda a yega na 0,8 porciento, un aumento di 0,4 punto di percentahe.
Turismo
Durante e prome shete lunanan di 2018, e desaroyo den e indicadornan di turismo a registra crecemento, ya cu a nota un expansion den e cantidad di bishitantenan (+2,0 porciento), anochinan permaneci (+2,0 porciento), y cantidad di turistanan crucero (+3,6 porciento).
Placa den circulacion
E cantidad di placa den circulacion a registra un subida di Afl. 181,1 miyon te na Afl 4.388,4 miyon den juli 2018, compara cu december 2017. Esaki ta debi na un aumento den e activo domestico netto (+Afl. 133,1 miyon) y den e reserva di divisa netto (+Afl. 48,0 miyon, incluyendo e diferencia di revaluacion).