Rescate di teatro di Ser’i Noka, nos patrimonio nacional

Cu su gran apertura riba 8 di December aña 1963, Aruba a sera conoci cu un teatro nobo y totalmente diferente di loke e isla tabata custumbra cune.
Un teatro excepcional den aire liber den semehansa di amfiteatronan Romano y Griego.
Esaki a wordo construi como parti di celebracion di 100 aniversario e tempo ey di Parokia di Santa Cruz y tambe
cu e meta pa engrandece y stimula cultura y creatividad riba nos isla.

Nos pueblo por a disfruta pa hopi tempo di varios produccion artistico cu a wordo presenta den e teatro aki. For di obranan teatral manera “Maria di Ser’i Noka”, “Navidad di Santa Cruz”, pa festivalnan di Aguinaldo y Ranchera.
Varios hende ta corda ainda e competencianan di e mihor bandanan di “Rock & Roll” di nos isla of presentacionnan di artistanan internacional manera Mirtha Perez, Charito de Venezuela, Ivo di Los Supersonicos, Raul Aranda, Henry Salvat, elenco di Radio Rochela y mucho mas. Esnan cu semper a luci mas cu nunca riba e escenario di Ser’i Noka mas cu claro, semper tabata nos artistanan di Aruba. Nos por corda eventonan mas recien tambe manera “Tragoidia” cu a wordo produci door di Olga van Bochove y presenta di un forma sublime na November 2016.
Tambe e concierto historico y impresionante “Di nos fo’i Ser’i Noka” di Edjean Semeleer na Maart 2017 pa e celebracion di nos dia di himno y bandera.

Un di e momentonan di mas importante y emblematico den e historia di e teatro tabata riba 24 di Februari 1965, na momento cu Su Alteza Real Prinses Beatrix a bishita e sitio aki. Su interes pa bishita e anfiteatro tabata masha grandi.
Su fascinacion y admiracion pa cu e teatro di Ser’i Noka, tabata hopi bisto riba e atardi aki.
For di e dia ey Princesa Beatrix a expresa su deseo ferviente na e elenco di Mascaruba, pa e teatro por tin hopi exito y pa e sigui existi pa hopi generacion por haci bon uso di dje y asina aporta na e desaroyo positivo di nos comunidad.

Lastimamente cu e pasada di tempo y debi na poco atencion y mantencion pober, e teatro a drenta un periodo largo di deterioro. E deseo grandi di henter nos pueblo semper a keda bibo si, cu un dia nos lo por mira e anfiteatro di Ser’i Noka bek den su gloria.
Nos por bisa cu porfin e momento a yega cu e esfuerzonan di rescate y restauracion lo cuminsa tuma lugar.

Ya ta algun luna caba cu riba iniciativa y acercamiento di Go Cultura, representa pa cantante local Edjean Semeleer cu ta co-fundador tambe di e fundacion, cu varios combersacion a tuma lugar y tambe acuerdonan importante a wordo haci cu Pastoor Jairo Maduro cu ta esun na cabes di Parokia di Santa Cruz pa asina pronto por cuminsa cu e trabaonan urgente di limpieza y merecido restauracion y renobacion di e teatro den aire liber aki cu pa masha hopi aña tabata den decadencia.
Cu conseho y supervision di arkitectonan local, e restauracion muy pronto lo cuminsa.

Parokia di Santa Cruz representa pa Pastoor Jairo Maduro ta supervisa y ta brindando tur cooperacion y sosten necesario na Fundacion Go Cultura pa asina e trabaonan por wordo ehecuta.
Cu mira pa futuro, Parokia di Santa Cruz ta sumamente entusiasma y ta opina cu e desaroyo aki ta hopi valioso y positivo considerando cu eventonan cultural den e teatro aki lo sirbi como un forma excelente pa fomenta aprecio pa nos herencia y pa stimula union di nos pueblo.
E ta brinda e posibilidad tambe pa e parokia por genera y recauda fondo no solamente pa mantencion di e teatro mes, pero tambe pa renobacion y mantencion di su otro edificionan, haciendo asina e esfuerzo di hiba un maneho sostenibel di su edificionan y ehecuta programanan y actividadnan importante cu e meta pa trece nos pueblo hunto.

E noticia aki sigur ta uno extraordinario pa un causa excepcional.
Un mision di rescate cu merece sosten y respaldo total no solamente di e pueblo di Santa Cruz pero for di nos isla completo.

Pa e motibo ey tambe, ta pidi ayudo y apoyo di nos pueblo cu mescos cu a sosten’e na aña 1963, pa apoya y uni nos mes na e hazaña sumamente valioso aki pa hunto nos rescata y sigura un era nobo pa Ser’i Noka.

Nos ta encurasha tur esnan cu kier yuda financieramente cu e rescate, restauracion y renobacion di nos teatro den aire liber cu ta wordo considera como nos patrimonio nacional, pa tuma contacto cu Fundacion Go Cultura na telefon 5830808 of bishita e website: www.gocultura.org pa mas detaye di e proyecto historico di rescate aki.

Specialmente nos muchanan, hobennan y futuro generacionnan merece pa nos compromete nos mes no solamente na construi pero tambe mantene nos patrimonionan y traspasa lo mihor na nan.
Un herencia asina importante manera un teatro ta yuda crea adelanto, ta brinda hopi oportunidad y ta sirbi como plataforma di gran balor pa nos sernan creativo por desaroya y expone nan talento.
E ta sirbi tambe pa stimula convivencia social y amical pa un cultura inclusivo y diverso.
Fundacion Go Cultura asina ta sigui cumpli cu su mision di aporta na prepara y motiva nos hendenan door di desaroya, educa y cultiva ciudadanonan cu ta culto, inspira, feliz, empodera, eleva y consciente di nan rol den nan comunidad, anima pa sigui traha hunto pa engrandece nos pais.

Ser’i Noka ta conta cu bo apoyo.

Comments

comments