Internacional: Republica Dominicana a cera tur frontera tera, aereo y maritimo cu Haiti diamars den un disputa tocante e construccion di un canal ariba tera di Haitiano cu ta conecta na un riu comparti, mientras soldadonan Dominicano arma tabata patruya e punto di entrada y avionnan militar tabata bula ariba.
Vuelonan a wordo cancela y e ciudadnan na frontera cu usualmente ta yen di Haitianonan cu ta crusa tur dia pa traha na Republica Dominicana tabata trankil. Multitud di hendenan na banda Haitiano a reuni bou di sombra di palonan mientras nan tabata observa e situacion diamars. Cercano, un bandera blanco tabata bula den biento bou di un bandera Haitiano como un señal di paz.
No ta cla cuanto tempo e ciere di frontera lo dura, cu Presidente Dominicano Luis Abinader a bisa cu e medida lo keda na vigor “mientras ta necesario.” Ministerio di Relacionnan Externo di e pais a bisa den un comunicado cu e proyecto di canal ta viola un tratado di 1929 y “mester wordo para inmediatamente prome di sigui cualkier otro dialogo.”
Abinader a duna orden pa su administracion cumpra tur producto procedente cu normalmente ta wordo exporta pa Haiti, manera di cas y mucho mas. E cuminda lo wordo usa pa programa gubernamental cu ta ofrece cuminda gratis na studiante y otro hendenan, segun Joel Santos, Minister di Presidencia.
“Ta realmente un medida masha drastico cu no tin sentido economicamente pa ningun di dos pais, Republica Dominicana ni Haiti,” a bisa Diego Da Rin cu International Crisis Group. “Esaki lo tin consecuencianan masha malo economicamente den Republica Dominicana y masha probablemente lo empeora e situacion humanitario, specialmente den e areanan cerca di frontera.”
Haiti ta e tercer socio comercial mas grandi di Republica Dominicana, cu $1 miyard den exportacion pa Haiti aña pasa y $11 miyon den importacion, segun e Centro di Exportacion y Inversion di Republica Dominicana.
