Minister di Turismo, Sr. Otmar Oduber, conhuntamente cu Aruba Tourism Authority tin e sumo placer y honor pa anuncia cu Airbnb – lider mundial den loke ta trata acomodacionnan ofreci bao di e capa di ‘Sharing Economy’, tambe lo bay ta presente durante e Happiness 360 Conference cual lo tuma luga dianan 13 y 14 di September venidero. Shawn Sullivan, public policy lead pa area di Centro-America y Caribe lo bay ta un di e panelistanan principal durante e conferencia importante aki, cu ta un vision cu a nace cerca Minister Oduber pa posiciona Aruba di un manera diferente y sigur riba mapa mundial pa medio di e asociacion cu UNWTO.
Airbnb, un compania funda na 2008 y cu headquarters na San Francisco, California, ta un online marketplace cu ta laga personanan ofrece, busca y huur casnan pa pasa vakantie. E tin mas cu 1,5 miyon di listings na 34.000 diferente ciudad den 191 pais rond mundo. Shawn F. Sullivan ta e oficial mas importante di Airbnb pa e region di Centro-America y Caribe, representando su compania directamente cerca gobierno, agencianan regulatorio y stakeholders local. Prome cu el a haya e cargo aki serca Airbnb, Sullivan tabata traha entre otro como diplomatico y consultant riba tereno di relacion intergubernamental.
AIRBNB Y ‘OTHER ACCOMODATIONS’ NA ARUBA
E fenomeno mundial di sharing economy ta uno cu a toca turismo di Aruba tambe. Sharing economy ta e modelo economico den cual personanan ta uza facilidadnan priva di otro en bes di companianan. Den mundo di turismo esaki ta manifesta su mes den turistanan optando pa keda na casnan priva en bes di na un hotel. Gran mayoria di e bookings aki rond mundo ta tuma lugar via Airbnb, cual ta e lider mundial pa cu e industria specifico aki.
Hecho ta cu na momento aki locual ta wordo clasifica como ‘other accomodations’ ta constitui no menos cu un tercera parti di henter nos industria turistico y esaki ta inclui estadianan di acomodacionnan ofreci via Airbnb. Aruba Tourism Authority ta studiando activamente con pa integra e modalidad aki den henter e experiencia turistico di Aruba. Tambe ta tumando accionnan pa sigura un maneho debido di e modalidad aki.
Por ehempel, recien a invita April Rinne, experto riba tereno di sharing economy, pa un sesion hunto cu stakeholder y operadornan di e acomodacionnan na Aruba. Rinne a expresa di ta mira masha hopi potencial mes pa Aruba no solamente bira un lider pa loke ta sharing economy den region di Caribe pero kizas tambe pa henter mundo. Invitando Shawn Sullivan pa ta un di e panelistanan principal na e Happiness 360 Conference ta mustra cu Aruba ta serio den su proposito pa cumpli cu e potencial aki.
Happiness 360 Conference ta tuma luga dianan 13 y 14 di September proximo. E conferencia aki ta conta cu participacion di nombernan grandi den industria turistico, manera entre otro United Nations World Tourism Organization y Florida Caribbean Cruise Association, y awo tambe Airbnb. Tema central cu lo bay wordo discuti ta e factor di felicidad como parti di e experiencia turistico di un pais como tambe e importancia di cultura den e experiencia aki. Tambe lo bay trata e ultimo tendencianan den mundo di turismo.
