Reportero di crimen Peter de Vries tira na Amsterdam

E reportero di temanan di crimen Peter de Vries a wordo tira awe riba Lange Leidsedwarsstraat na Amsterdam. Autoridadnan a confirma esaki na prensa Hulandes.

De Vries anochi (atardi na Aruba) tabata invitado den studio di RTL Boulevard. Despues cu el a finalisa, a tir’e pafo riba caya.

Testigonan a scucha cinco tiro. Segun e testigonan, a tira de Vries den cabes. Riba rednan social tin diferente imagen ta circula, unda por mira de Vries hopi cla cu un tiro den cabes.

A transporte cu urgencia pa hospital, polis a informa. Polisnan mesora a bay en busca di un homber color cla, flaco, bista cu un jas berde (camufla) y un pechi preto.

De Vries ta conoci pa su reportahenan di criminalidad, y regularmente ta aparece como vocero of persona di confiansa den casonan politicial of casonan di corte. Asina e tabata e persona di confiansa pa e testigo principal den e proceso Marengo, esta Nabil B.

Ta hustamente debi na e caso aki, e tin basta tempo caba bou di proteccion y na 2019 el a bisa cu e ta aparece riba lista di asesinato do Ridouan Taghi, e principal sospechoso den e caso Marengo, cu e tempo ey no a wordo deteni ainda. E aña ey tambe nan a tira e Abogado Derk Wiersum mata. E tabata abogado di e testigo principal. Ruman di e testigo aki tambe a wordo likida.

Tambe de Vries a entrevista Joran van der Sloot, sospechoso den desaparicion di Natalee Holloway na 2005 aki na Aruba.

Diferente miembro di Tweede Kamer a keda den shock cu e noticia y a skirbi esaki riba nan rednan social. Lider di PVV, Wilders a bisa riba Twitter: “Laat het niet waar zijn”, y asina tin mas.

 

Comments

comments