E renobacion di e diferente facilidadnan deportivo restora bou di Fundacion Facilidadnan Deportivo, FFD ta bayendo bon. Segun tesorero di F.F.D, sr. Di Stefano Wernet RA un di e prioridadnan di Minister di Deporte, Dr. Alex Schwengle semper tabata pa renoba tur e facilidadnan deportivo di FFD, haci e cambionan necesario, pa pone lusnan nobo pero tambe na drecha e tribunanan cu tabata den un mal estado, den e caso akin a Centro Deportivo Frans Figaroa. E proyectonan ta bayendo bon mientras cu tin plannan grandi pa stadion Guillermo Trinidad na Dakota, e stadion di Nadi/Crismo na Sta Cruz y Joe Laveist na San Nicolas. Mester bisa cu a tene cuenta cu tur disctricto den e trabou di renobacion. A indica cu mester bay na drecha e mantencion, awo tin mas placa disponibel, pero e uso continua di e facilidadnan lo bay bira un prioridad. Mester bay cuminsa na stimula e uso di e diferente complehonan deportivo cu nos tini paso ta pesey nan a wordo traha.
Den bista di Sr. Wernet tin demasiado complehonan deportivo riba nos isla, por inverti pero mester corda cu mantencion cada bes ta bira mas dificil paso e ta costa hopi placa. Un ehempel a duna di e complehonan deportivo cu a wordo usa den e Weganan Olimpico di Rio 2016 unda e mayoria ta un ruina awor aki, capital a wordo destrui mientras cu por a inverti esaki den un otro caminda manera den e atleta/deportivo mes of den enseñanza. No mester lubida cu deporte y enseñanza ta e yabi pa un comunidad sano, e ta trece disciplina, determinacion y ta yuda na yega na un bon formacion como cuidadano responsabel.
Por ultimo sr.Wernet a indica cu den e periodo di vacacion grandi lo termina cu e trabounan riba e stadion di Frans Figaroa na Noord y esaki lo ta operacional pa tur usuario.