Diamars 13 di September ultimo AZV y SWG a firma un contracto nobo referente e praktijkondersteuners. Manera ya ta conoci, na aña 2012 AZV hunto cu Stichting Wit Gele Kruis a start un proyecto relaciona cu e seleccion, institucion y guia di praktijkondersteuners. E proyecto aki a inicia originalmente den aña 2009 ora cu AZV a haya e peticion di Huisartsen Vereniging van Aruba (HAVA) pa cuminsa traha cu praktijkondersteuners den e oficinanan di e dokternan di cas.
Meta primordial
E praktijkondersteuner ta un persona studia riba e nivel HBO y cu amplio experiencia den e ramo di cuido di pashent. E rol di e praktijkondersteuner ta pa asisti e dokter di cas den e cuido y guia di pashentnan diabetico of pashentnan cu malesanan cardiovascular. Pues e meta primordial di e introduccion di praktijkondersteuners ta pa mehora e cuido pa pashentnan cu malesanan cronico.
Tarea
E praktijkondersteuner ta e persona cu ta duna e pashent informacion, guia y motivacion pa e pashent por keda cumpli cu su controlnan regular y pa e pashent cumpli cu e tumamento di su remedinan segun prescripcion di e dokter di cas. E praktijkondersteuner ta traha independiente, siguiendo e plan di tratamento di e dokter di cas y bou di e responsabilidad di e dokter di cas. Por wak ambos como un ekipo trahando hunto na benificio di e pashent.
Contracto renoba
Presente na e firmamento di contracto nobo aki tabata señor drs. Anco Ringeling (director di AZV), señora drs. Noëlle de Jong (accountmanager AZV), señor Gino Goeloe (director SWG), señor Jan Segers (presidente SWG) y señor Edwin Roos (secretario SWG). Mester menciona, cu dentro di e contracto nobo aki, a palabra tambe e ampliacion cu 7 praktijkondersteuners extra na final di e aña aki. Cada praktijkondersteuner lo traha na dos diferente oficina di dokter di cas.