Cu e meta pa haya tur informacion corecto riba e forma cu e nombracion di un gobernador nobo pa Aruba, e fraccion di AVP den Parlamento a haci un serie di pregunta na Prome Minister di Aruba. Dialuna mainta 10:30 Minister Presidente lo contesta e preguntanan aki den sala di Parlamento. E reunion aki lo wordo transmiti via canal di television di Parlamento di Aruba.
A haci e preguntanan aki pa haya tur informacion necesario prome cu saca conclusion final riba loke a sosode y prome cu dicidi kico lo ta e siguiente pasonan. Mientrastanto e miembro di Parlamento Hulandes, sr. Mustafa Amhaouch, tambe a haci seis pregunta na Minister di Asuntonan di Reino, sr. Ronald Plasterk. E a pidi pa haya e contestanan di e minister pa mas tarda dialuna 24 di October.
E importancia di e preguntanan di e fraccion di AVP ta cu den paisnan democratico tur decision mester cumpli cu ley of cu palabracion legal. Ata akibou mayoria di e preguntanan cu AVP a haci:
Minister por informa Parlamento si e procedura legal pa nombra un gobernador (interino) pa Antias Hulandes y Aruba, cu a wordo acorda den Conseho di Minister di Reino na 2001 ta vigente ainda?
Si esey ta e caso, Minister por informa Parlamento si e procedura cu a sigui pa nombracion di un Gobernador nobo pa Aruba, a bay segun e procedura cu a wordo acorda den Conseho di Minister di Reino na 2001?
Minister por describi pa Staten e rol cu Gobierno di Aruba, cu e Minister Hulandes encarga cu asuntonan di Reino y cu Conseho di Minister di Reino tin den e procedura aki?
Minister por confirma of desmenti si ta corecto cu den e procedura acorda ta Gobierno di Aruba so tin e posibilidad pa presenta candidatonan pa e funcion di Gobernador di Aruba?
Den e procedura acorda tin limitenan di tempo (“deadlines”) fiha pa presenta candidato of pa nombra un di e candidatonan cu a wordo presenta?
Conseho di Minister di Aruba a presenta candidatonan pa nombracion di un Gobernador nobo di acuerdo cu e procedura? Minister por comparti e lista di candidato cu Conseho di Minister di Aruba a presenta cu Parlamento? Tabata tin durante di e procedura mas cu un lista cu a wordo presenta?
Tur e candidatonan y e persona cu a wordo nombra a cumpli cu tur e exigencianan (incluso screening di siguridad) pa wordo presenta como candidato pa e funcion aki?
Ki ora y pa cua motibonan Conseho di Minister di Reino a rechasa e candidatonan cu Conseho di Minister di Aruba a presenta? Si esey a sosode, Conseho di Minister di Aruba a presenta of a haya e oportunidad pa presenta un lista di candidato nobo?
Conseho di Minister di Reino a presenta y nombra e persona cu na e momento ey tabata ocupa e funcion importante di Minister Plenipotenciario di Aruba na Hulanda. E presentacion y nombracion di e candidato aki a bay di acuerdo cu e procedura legal cu a wordo acorda na 2001?
Si e desicion di Conseho di Minister di Reino pa nombracion di e gobernador nobo no a bay di acuerdo cu e procedura legal acorda, e decision aki tin forsa legal?
Den e declaracion cu e ministernan a emiti despues di e reunion na Den Haag siman pasa, ta poni cu e procedura cu a sigui “geen schoonheidsprijs verdient”. (Traduccion: e proceso no ta uno bunita) Minister por splica kico esey ta nifica?
Minister Presidente di Aruba a bisa den e mes un declaracion cu e ta “leg zich bij neer”. (Traduccion: e ta somete su mes na e decision cu a tuma.) Minister por splica kico esaki kiermen y kico e consecuencianan di esaki ta?
E decision cu a tuma pa nombra un Gobernador nobo pa Aruba a causa discucion inecesario, expresion y conclusionnan infunda y division den comunidad. El a causa un prespectiva negativo pa ehecucion di e funcion door di e persona cu ta bay ocupa e funcion. Mirando tur esaki, Minister por splica kico Gobierno di Aruba ta pensa di haci pa restaura respet pa e funcion di Gobernador y pa restaura trankilidad den comunidad?