Imagina Bo cu Bo ta biba den un pais caminda leynan tey pero nan no ta conta pa tur hende of den tur situacion. Esey lo nifica cu pa algun hende leynan ta conta y cu e hendenan aki mester obedece leynan. Sea ta ley di belasting of ta ley di trafico riba caminda. E leynan aki ta conta pa e grupo di hende aki tur dia, tur aña y den tur situacion. Pero pa algun otro hende e leynan no ta conta of den algun situacion ta pone e ley un banda. Den un pais asina bo mester tin suerte si bo ta pertenece na e grupo priviligia cu ta “scapa di ley” hasta ora viola ley. Bo tin mala suerte si Bo ta den e grupo di hende pa kende tur ora y tur caminda e leynan si ta conta.
Dios gracia nos NO ta biba den un pais asina. Respet pa ley y cumplimento cu ley ta esencial den nos pais. Ta asina nos ta percura pa husticia: tur hende mester wordo trata mescos tur ora. Ora esey no sosode, cu rason nos ta lanta para y exigi cu ley ta conta pa un y tur! E importancia di cumplimento cabalmente cu ley den tur situacion y pa tur hende ta haci, cu ora politico of partidonan politico no cumpli cu ley of hasta sostene violacion di ley, nos ta desaproba esaki fuerte. E partido MEP a haci’e un custumber pa viola ley, falta respet pa ley, purba evita di cumpli cu ley y awor aplaudi ora cierto hende of grupo viola ley! Na 2014 Gobierno Hulandes a duna instruccion na Gobernador di Aruba pa wanta e presupuesto cu Parlamento di Aruba a aproba. Esaki tabata un violacion flagrante di Statuto di Reino y di autoridad di Parlamento. MEP a sostene e violacion di ley aki door di Gobierno Hulandes. Hasta ora Raad van Advies di Aruba y Raad van State di Hulanda a bisa cu Gobierno Hulandes – bisti cu e mascara di Gobierno di Reino – a actua completamente robes, MEP a sigui sostene e violacion flagrante aki di autonomia di Aruba. Awor na 2016, Gobierno Hulandes ta viola e procedura pa nombra un gobernador. Esaki ta un procedura cu gobierno di MEP mes a acorda cu gobiernonan di Antias y Hulanda na 2001. Enbes di para y defende ley y palabracionnan legal cu a wordo haci, MEP ta bolbe aplaudi e violacion di palabracionnan legal cu nan mes a haci. MEP ta bolbe sostene violacion di autonomia di Aruba! E respet pa aplicacion di ley den forma igual pa tur hende y bou tur condicion cu Pueblo di Aruba ta haya asina importante, no ta refleha den e opinion, expresion of comportacion di MEP y su lidernan. MEP obviamente no ta refleha loke Pueblo ta sinti y cu ta asina importante pa Pueblo y pa orden y husticia den nos pais. Obviamente MEP, cu den gobierno a viola ley sin fin ( = wak raport di WODC) y den oposicion ta sigui sostene y aplaudi violacion di Statuut y ley door di gobierno Hulandes, si ta kere cu ley NO mester conta pa tur hende y bou tur condicion. Obviamente MEP ta sigui kere cu mester tin “friends and family” pa ken ley no ta conta. Obviamente MEP ta sigui kere cu un gobierno Hulandes por pone ley un banda ora ta cumbini’e, mescos cu MEP a custumbra di haci ora nan tabata den gobierno. Awor ta na Pueblo ta dicidi ta den cua pais e kier biba. Den esun di “friends and family” y cu ta pone ley un banda ora ta cumbini e gobierno di MEP of un pais den cua ley ta conta pa un y tur, y bou tur condicion!