E nombracion di e gobernador nobo di Aruba a bay contra di proceduranan palabra na 2001. Gobierno Hulandes a reconoce publicamente cu el a actua robes. E eror cu Gobierno Hulandes a comete sinembargo ta mas grandi cu un simpel declaracion cu “e procedura no a bay netchi” por corigi. Den un pais y un Reino cu ta traha a base di ley y den cua respet pa ley, regla y palabracionnan ta fundamental, un eror asina grave no por wordo atendi cu un simpel “despensa”. Sigur no si e tipo di eror asina grave ta wordo cometi pa di dos biaha! E mester tin mas consecuencia pa esnan cu a comete e eror, pa futuro y pa sigura cu e base di con nos ta funciona como pais, ta keda e respet y cumplimento estricto cu ley y reglanan di nos pais y di Reino.
RESPET PA LEY Y PALABRACION
E rol negativo y oportunista cu e lider di MEP a hunga den esaki, lo bay persigui Aruba, Reino y e partido MEP mes pa hopi aña. Ora Gobierno di Hulanda a trapa riba e procedura pa nombra gobernador, MEP a aplaudi e violacion aki y a bay para na banda di e violado. Pa colmo e procedura pa nombra gobernadornan nobo a wordo acorda bou di Gobierno di MEP! E credibilidad di e partido MEP na Aruba y den paisnan di Reino a sigui cay. Atrobe e oportunismo y gana di mancha gobierno di Aruba, enbez di para pa respet incondicional pa ley y palabracionnan haci, a mustra cu MEP y su lider no por actua di un forma cu hende por confia aden. E gana di critica y mancha gobierno di Aruba a bira mas importante pa MEP, cu para pa loke ta bon y corecto. En berdad oportunismo a ciega MEP!
DAÑO
E forma cu a nombra e gobernador nobo a causa hopi daño. Entre otro Hulanda a bolbe kibra e confiansa entre e cuatro paisnan di Reino. Despues di otro erornan serio cu Gobierno di Hulanda a comete recientemente, e nombracion di e gobernador contra di palabracionnan cu a haci, ta crea duda grandi di si gobierno Hulandes ta di confia. Ki balor por duna na palabracionnan cu haci cu nan, si despues nan ta bira kibra nan tog?
E nombracion den e forma aki a causa daño serio na e funcion di gobernador tambe. Raad van State a caba di describi e funcion di gobernador como uno cu no ta un extension di gobierno Hulandes. Door di scoge y nombra un persona cu Gobierno Hulandes kier y pone e candidato cu gobierno di Aruba a propone un banda, a crea duda serio di si e persona cu Hulanda a scoge en berdad por ta independiente di Hulanda. E nombracion contra di e procedura oficial a crea e impresion cu e funcion di gobernador ta nada mas cu un simpel marioneta di Gobierno di Hulanda. Pesey e duda di si e lo por para Hulanda ora por ehempel nan purba mete den asunto interno di Aruba.
E nombracion aki a causa daño na e persona mes. Door di acepta un nombracion cu no a bay segun e procedura acorda y sin sosten di su Gobierno manera e reglanan ta stipula, el a causa un kiebro serio di confiansa cu Gobierno di Aruba. Anto como gobernador e tin cu traha tur dia cu e Gobierno di Aruba! Finalmente e nombracion a crea un division serio den comunidad. E division aki a wordo empeora door di cu MEP a hinca e nombracion di e gobernador den un sfera politico partidista. Cu esey awor e persona cu a wordo nombra ta bira gobernador di un pais dividi. E division aki ta riba su consenshi y di MEP. E tin cu traha cu e pais dividi aki y cu tin duda den dje, tur dia. Oportunismo en berdad ta ciega hende!