Un di e cambionan mas grandi cu Gobierno di AVP a haci den ultimo añanan ta e cambionan pa salba e fondonan di pensioen. Hunto cu cambionan den organisacion, ley y reglanan cu e fondonan tin cu traha cun’e, a haci un inversion grandi den e fondo di pensioen di trahadornan di Gobierno, maestronan di scol, trahadonan di companianan di Gobierno y trahado di fundacionnan. E fondo APFA tabata na caminda di bancarota na 2009. Esey lo a laga miles di hende sin entrada di nan pensioen. Door di e restructuracion di e fondo, cambionan dificil den e ley y reglanan y un inversion di 180 miyon florin, a logra salba e fondo. Anto a haci esaki sin corta niun biaha den e pensioen cu e pensionadonan ta cobra tur luna. Awe e fondo ta bek riba pia. E cobertura di e pensioen di e miembronan cu a cay te banda di 60%, awe ta bek na mas cu 100%. Cu esaki e pensioen di e pensionadonan di APFA ta sigura pa e proximo decadanan.
GAÑAMENTO DI MEP
Recientemente e partido MEP a bolbe purba spanta pensionadonan y pueblo bisando cu Gobierno debe APFA casi 900 miyon florin na prima. Ta mas cu obvio cu e informacion aki ta totalmente incorecto. Si MEP a tuma e molester di haci un tiki investigacion, nan lo a haya sa cu Gobierno no debe APFA placa. E primanan ta wordo paga debidamente y e pensioen di e pensionadonan ta sigura.
INVERTI
Loke e fondo APFA ta haci ta inverti parti di e placa pa asina gana placa extra y pone esaki den e fondo pa e crece y sigura e cobertura di e fondo miho. Segun reglanan di APFA por inverti 40% di su placa den exterior y 60% na Aruba. E 60% cu APFA tin inverti na Aruba ta yega un suma di 875 miyon florin. E inversion aki a produci un suma di 52 miyon florin cu ta wordo usa pa fortifica e fondo y sigura miho e cobertura di e pensioen di su miembronan. Ta parse cu MEP a bruha e sumanan sin haci mas investigacion. Pero e simpel echo cu a publica e informacion incorecto aki, ta mustra e mal intencion di gaña pensionadonan y comunidad. Enbes di yuda construi mas nos pais, MEP ta sigui gaña y sembra discordia.