Rene Herde di AVP: No tin kiebro den fraccion pasobra tin diferencia di opinion riba un amienda

No tin kiebro den fraccion di AVP, djis pasobra tin diferente opinion riba un amienda. Esaki ta segun lider di fraccion di AVP, Rene Herde.No ta prome biaha cu ta topa temanan pisa y dificil. E tema di e amienda pa union civil tabata uno pisa. E tabata conoci prome cu e reunion caba cu tabata tin grupo di miembro di fraccion di AVP cu no lo sostene. E mesun grupo di cinco diahuebs a bisa cu nan no ta sostene. Kiermen esey no ta nada nobo. Tur hende den comunidad tabata sa di esey. Esey no ta causa di kiebro.
Diahuebs anochi sin embargo tabata tin situacionnan den sala di Parlamento cu a haci fastioso pa diferente hende. Di tur fraccion y diabierna por a wak’e riba social media, na radio, e ta un tema dificil pa nos comunidad y tin cu mustra respet pa tur hende. Si un miembro, Lorna Varlack a bay sinta otro caminda, ta mustra cu ainda tin cos pa haci pa kita e dolor di diahuebs. Cu esey ta hiba na kiebro, sigur cu no, segun Rene Herde.
Tur dia Herde ta papia cu su hendenan hopi biaha pa dia. Ta papia cu tur hende y por confirma cu tur siguridad cu kiebro no tin.
Di e conversacionnan cu Herde tabata tin, den e fraccion tabata tin discusionnan fuerte, sino no lo a yega na un version caminda cu cinco ta vota contra y e otronan ta pro. E tema a dividi nos comunidad, e tema a dividi fraccion, pero diferencia di opinion y a bis’e explicitamente den prome y di dos ronde diahuebs anochi. Tin diferencia di opinion den e tema aki. Den pasado tabata tin mas diferencia di tema. Ta wak situacionnan den pasado cu miembronan a vota contra di e gobierno cu nan mes ta sostene. Tin mas ley cu hendenan a vota segun nan mesun creencia. Diferencia di opinion den fraccion di AVP ta conoci. E democracia den e partido cu ta respeta otro su opinion. Diahuebs anochi, e respet ey tabata tey, pero tabata tin tambe intercambio di palabra y ta wak’e. Herde no por kita un hende di bisa cu el a sinti su mes asina incomodo y pesey por lo pronto e ta asumi e actitud ey, pero kiebra den AVP no. A pasa door di situacion dificil den pasado y den futuro lo tin situacionnan cu miembronan ta bisa cu si. Herde tin otro opinion cu fraccion y den fraccion di AVP por bisa cu no ta cera porta, no ta cambia slot di porta, no ta saca hende for di partido. Ta respeta otro su opinion. Democracia den comunidad tambe ta conta den un partido.

Comments

comments