E programa di AVP pa e cuatro siguiente añanan di gobernacion 2017-2021, ta parti den cuatro seccion. Cada seccion ta encera un cantidad di tarea y responsabilidad di Gobierno. Por ehempel, responsabilidad di Gobierno pa enseñansa, cuido di salud, siguridad, vivienda, barionan tur ta wordo trata bou di e capitulo “Crea un comunidad vibrante”. Di e forma aki e vision y co-relacion entre diferente area di maneho ta bira mas cla. E cuatro seccionnan di e programa ta: Prosperidad, Comunidad, Oportunidad y Stabilidad. Den e cuatro seccionnan aki ta describi e metanan principal cu AVP a fiha pa e añanan nos dilanti. E meta cu ta encera tur esfuerso cu AVP ta bay haci ta pa percura pa e progreso cu nos isla a conoce den e ocho aña di gobernacion di AVP y tur cu e ta bay haci awor, wordo traduci den PROSPERIDAD pa tur hende na Aruba. Sea ta den trabou y entrada, enseñansa y cuido di salud, medio ambiente y vivienda. E prosperidad mester sigui yega na tur hende. E ta un meta ambicioso, pero basa riba e bon resultado di e ultimo añanan, e ta un meta realistico. Mas ainda e ta exactamente loke pueblo mes ta pidi pe! Nan a wak e progreso, nan a sinti e progreso. Awor nan kier pa e sigui y pa nan sinti’e den tur ramo di nan bida. Y pueblo ta bisa cu ta AVP so por haci e mehoracion aki realidad pa nan!
TRADUCI PROGRESO DEN PROSPERIDAD
Esaki ta nifica den vision di AVP cu famianan ta sigui bay padilanti. Cu nan no tin e ansha di pensa con paga nan gastonan di cas; pa nan por percura pa nan mayornan di edad y brinda un miho futuro na nan yiunan. Pa por realisa esaki, tanto den economia, trabou, enseñansa, cuido di salud, siguridad, vivienda y bida den barionan, hende mester ripara cu nan ta bay dilanti y cu nan calidad di bida ta mehora. Ta obvio cu esaki no ta tarea di gobierno so. Pero den vista di AVP, ta tarea di gobierno pa crea e condicionnan pa esaki y stimula pa e sosode. Kiermen cu Gobierno mester sigui hiba un maneho pa e economia di Aruba sigui crece riba un curso sostenibel y crea trabou pa tur hende cu kier traha. E ta nifica cu gobierno mester sigui mehora e infrastructura di Aruba y crea espacionan sigur, liber di crimen, pa hende por realmente sinti nan mes mas sigur y miho. E ta nifica cu gobierno mester percura pa mehora ainda mas e acceso na cuido di salud di calidad, cu scolnan ta yuda nos yiunan pa nan tin exitoso den nan estudio y despues den trabou. E ta tarea di gobierno pa yuda crea barionan cu ta encurasha hendenan pa traha hunto y bin hunto. Prosperidad ta traduci directamente den e calidad di bida den tur forma y den e programa di AVP ta splica pa cada tereno di gobernacion, kico ta bay haci pa realisa esey. Si bo kier sa mas di e plannan di AVP pa e añanan venidero, por lesa y “download” e programa di AVP for di e website www.avp.aw