Durante conferencia di prensa semanal di AVP, lider di fraccion y vice presidente di Parlamento, Rene Herde, a comenta cu ainda e partido no tin opinion riba nombracion di e gobernador di Aruba haci pa Gobierno Hulandes.
E ta sigui splica cu partido AVP no a fiha nan posicion final y pa e motibo ey, tur ta tene palabracion como partido di no duna comentario riba dje.
El a lesa publicacion di varios corant y tambe den Awe Mainta, cu ta indica varios punto real, hechonan, kico AVP ta haci, con ta bay atende cu e situacion aki, kico e ta haci pa e relacion cu Hulanda. Ta puntonan cu ta den combersacion y na su debido tempo AVP lo duna su punto di bista.
E posicion di lider di fraccion di AVP ta nada compara cu e posicion di gobernador. E ta e posicion di mas halto di nos pais. E ta hefe di Gobierno di Aruba, representante di Reino na Aruba. Ta anda cun’e cu e cautela maximo, tanto den e proceso di nombracion y kico ta haci cu bo haya un nombracion asina. Ta pa e motibonan di cautela y sentido di responsabilidad ey, AVP no a duna ningun declaracion ainda.
Herde a sigui splica cu e mes tin un punto di bista como AVP, y ainda no a fiha un punto di bista y e ta mantene na e palabracion ey.
Lo warda pa conhuntamente pone tur cos riba mesa. Tin cu corda cu esaki ta sosode net momento cu ta bezig cu e cambio di mas grandi den economia di Aruba. Citgo a tuma atencion di tur hende. Esey tambe ta algo, cu pakico el a sosode na e momento ey y di e forma ey. Cu tur respet, AVP lo comunica cu prensa y comunidad, pasobra e ta responsabilidad di tur pa comunica na comunidad y tin un realidad riba mesa y cu tur sentido di responsabilidad y respet pa e funcion di Gobernador, AVP lo informa comunidad.