Siman pasa MEP a publica un articulo den cual nan kier a cea e impresion cu AVP y ami, Rene Herdé, lo ta manipula informacion y cifranan, pa asina malinforma pueblo. Specificamente nan a menciona y publica un grafico cu ami a traha unda ta mustra cu e tasa di desempleo a baha for di 11% na 2009 pa 6% e aña aki y cu pa fin di otro aña ora e refineria cuminsa rafina petroleo, e tasa di desempleo sigui baha te mas o menos 5%.
Mi a busca e cifranan cu Departamento di Labor a publica recientemente, basa riba nan investigacion di desaroyonan den mercado laboral. Mi a usa e cifranan cu Departamento di Labor a publica pa actualisa e grafico cu ami a publica mas cu un biaha. E resultado di e cifranan nobo di Departamento di Labor ta e liña berde den e grafico cu mi ta bolbe publica aki. E conclusion di e cifranan nobo di Departamento di Labor ta confirma cu e tasa di desempleo a baha! Kier men cu niun manipulacion di cifra of malinformacion na pueblo. E cifranan nobo ta confirma cu entre 2009 y awe 2017, bou gobiernonan di AVP, e tasa di desempleo a baha di 11% pa 7.7%. Y na momento cu e refineria cuminsa procesa petroleo, e lo tuma mas hende na trabou. Esaki lo sigui redusi e tasa di desempleo ainda mas te rond di 5%. E calculacion aki ta basa riba e cantidad di trahado cu e refineria lo tuma na trabou. E reduccion di desempleo ta wordo confirma tambe door di e cifra di Departamento di Labor di hende cu ta traha y e aumento di hende cu ta registra na Banco di Seguro Social (SvB).
Conclusion: e intento aki di MEP pa bruha tera tambe a faya! E tasa di desempleo a baha desde cu AVP ta maneha nos pais y e ta bay sigui baha. Pasobra awor e refineria cu MEP a sera na 2007 ta bay bolbe cuminsa traha y lo tuma mas trahado den servicio.
Ta tristo pa constata cu hasta den loke MEP ta campeon, esta gañamento, MEP a cuminsa faya! Ta ken kier bay atras cu MEP? Ta PADILANTI nos ta bay cu AVP!