Realidad y cifra concreto no ta gaña. Cifranan verifica ta mustra cu Aruba a sali for di e crisis enorme cu e tabata aden na 2009 pa awor, riba su propio forsa. Sin ayudo di Hulanda. Pero tambe sin tuma medida! Un di e cifranan cu no ta gaña y cu Banco Central y CAFT mes ta produci, ta e crecemento economico. Entre 2007 y 2009 economia di Aruba a cay den un abismo di -15%. Segun Banco Central esaki tabata e pio caida desde cu e refineria di ESSO a cera na 1985. Segun Banco Central e caida entre 2007 y 2009 no tabata solamente pa motibo di e refineria cu a cera na 2009. Turismo y inversionnan en general a cay hopi. E influencia di e crisis mundial a empeora e situacion. Pero si bo wak kico a pasa cu economia di otro paisnan cu tambe a sinti e efecto di e crisis mundial, nan economia a cay cu 2 pa 3%. Economia di Aruba a cay den e mes un periodo cu 15%. Pesey e causa di e caida di economia di Aruba no tabata e crisis mundial. E causa principal tabata e mal maneho general di Aruba bou di gobierno di MEP. E cifranan di e periodo di MEP mes ta confirma esey. Pueblo mes tambe a expresa esey na hopi forma.
CAMINDA DIFICIL
E caminda pa e recuperacion di economia no tabata y ainda no ta uno facil of sin problema. Tur lo contrario. Aruba mester a depende solamente di turismo pa saca nos di e crisis. Niun ayudo ni sosten di afo. Al contrario. E bon maneho di turismo a duna su resultado! E cifra y graficonan di crecemento economico ta confirma e caminda dificil cu gobierno di AVP mester a cana pa saca Aruba for di e pio crisis economico, financiero, di confiansa y inversion, desde 1986. E caminda tabata uno di lanta, cana y dal para te hasta cay. Un caminda di adelanto y obstaculo cu a stroba e recuperacion. E grafico cu ta ilustra e caminda dificil ta confirma esey. Pero e liña di desaroyo economico ta uno di crecemento. Sigur compara cu unda nos tabata apenas 7 aña pasa. Tambe den comparacion cu paisnan bisiña. Awor cu e apertura di e refineria, e caminda di crecemento ta continua. Pa otro aña ta spera un crecemento entra 3.5 y 5%.
SIN MEDIDA
Un otro aspecto bunita di e recuperacion economico di Aruba ta cu bou gobierno di AVP a logra e recuperacion aki, sin ayudo di afo y sin tuma medida paden. Medida lo a haci cos pio pa henter nos pais! Pesey Gobierno di AVP a scoge pa baha gasto paden y inverti pa crece, enbes di pone medida riba pueblo. E maneho aki a logra saca Aruba for di crisis, manera a planea. Awor cu e apertura di e refineria e caminda padilanti ta mustra ainda miho. En berdad e ta un epoca nobo pa Aruba. Pero nos no ta cla. Ainda Falta!