E instalacion di arte interactivo mas grandi produci dor di artistanan Emily Strauss, Victoria Przetak, Francesca Quintaino y Tim Rowan di Mural Painters Inc. a keda instala na Renaissance Aruba Resort & Casino. E mural cu ta midi 5 piso lo ta centerpiece di e atrium na Renaissance Marina Hotel, complementando Renaissance Aruba su remodelashon y renovacion cu ta programa pa keda finalisa e aña aki, 2020. E instalacion a keda realisa pa e team di Renaissance Aruba Resort & Casino cu ta encarga cu e remodelacion cu sosten di Dash Design y consultornan lider den mundo di arte, Integrated Visions. Tabata Bryan Dodson y Michelle Dodson di Integrated Visions cu a percura pa e diseño riba e projectornan pa despues e artistanan por a elabora e pintura.
E obra di arte di 23 pia hancho pa 58 pia largo completamente pinta na man cu titulo ‘Turbulent Tranquility’ a wordo crea cu pintura latex cu base di awa y ta keda acompaña dor di cuater WUXGA projector di laser cu 6000 ANSI lumens y lensnan interactivo pa ofrece guestnan un experiencia dinamico y transcendental. E projectornan lo uza luz y efectonan visual multi-dimencional pa activa e instalacion via di projectornan cu ta crea un patronchinan di ilusion. “Nos tabata kier a introduci un experiencia cu no ta mara na tempo y ta unico na mes momento,” asina Paul Gielen, General Manager di Renaissance Aruba Resort & Casino a comenta. “Mientras cu nos ta continua pa embeyece y eleva nos resort for di cambernan te na programacion di evento, nos a haña oportunidad di traha cu un team visionario creativo di Dash design y Integrated Visions pa crea algo realmente nobo y cu lo cambia e manera di interaccion cu nos guestnan den futuro.”
E combinacion di tecnologia y arte lo crea un plataforma nobo pa guestnan y gruponan cu ta host eventonan na Renaissance Aruba. For di eventonan corporativo pa destination wedding te na exhibicion di arte local y presentacionnan musical, e arte den nos atrium por keda activa pa amplifica momentonan inolvidabel cu ta tumando lugar serca nos.