Remetido: Un evaluacion di nos turismo: Skirbi pa Remigio Wever

Mientras cu gobierno, y specificamente minister president Mike Eman y e minister di Finansas Angel Bermudez, ta persisti den un crecemento economico ficticio di 3.5 porciento pa aña 2016, ya esaki a wordo reahusta (lesa: coregi) door di Banco Central pa un crecemento di nos economia di unicamente 1.1 porciento!
Pero awor ta sali na cla cu ni e 1.1% aki lo wordo alcansa! E crecemento economico awor ta wordo reahusta na djis un mero minimo di 0.4%; y ta di con esaki??

NOS TURISMO CU A CAY DEN OTRO!
Precisamente!…..porfin UN instancia na Aruba a lanta for di soño!
Banco Central di Aruba (C.B.A. – Centrale Bank van Aruba) tambe a descubri cu e entradanan den turismo e aña aki lo defrauda y lo no yena e expectativanan, pues Pais Aruba lo tin menos entrada pa gasta – of pa paga gasto – y pa ta mas especifico, menos entrada for di impuestonan indirecto.
Di un banda ta algo positivo cu por lo menos UN instancia ta bati alarma, pero di otro banda e mesun instancia aki, pues Banco Central, no tin e corahe pa expresa su opinion riba e berdadero causantenan real di e crisis den turismo pa Aruba.
Diripiente Banco Central a cobardea y ta mustra nomas riba factornan externo; factornan di pafor, riba cua gobierno no tin ningun influencia. Ta for di pafor nan ta bini riba nos, y p’esey no ta nos culpa!
Ta basta hipocrita di Banco Central pa papia di: “Probablemente e sector turistico ta keda vulnerabel pa shocks na e banda di e demanda”, “e incertidumbrenan geo-politico den e regio”, “e clima economico swak”, y “e competencia regional cu ta sigui crece”. Esta un idioma hipocrita di marca mayor!

TA E MANEHO TA E CAUSANTE, Y NADA OTRO!
E economia mericano ta recuperando atrobe, pero Banco Central den un carta ta exonera gobierno, declarando cu gobierno no ta culpabel di e mal estado di nos turismo.
Banco Central ta bisa tambe cu Aruba no por yuda cu awor tin mas competencia di otro destinonan den regio. Esta un observacion estupido!
Pakico Banco Central no ta honesto y djis bisa: Awor Cuba a habri, y e minister di turismo no a haci nada eyriba, e no a prepara su mes NUNCA pa esey, y tampoco no a bin cu ningun estrategia pa haci lo mas minimo pa enfrenta e situacion aki.
Pio ainda: semper el a nenga cu Aruba lo tin algun molester of sufri di e re-apertura di Cuba pa turismo for di Merca.
Ainda mas pio: el a (yuda) hundi e producto Aruba! E calidad di nos playanan y di nos awa di laman a bay atras cu pasonan gigantesco; hecho ta cu e playa na Palm Beach y e awa di laman eybanda a perde tur nan calidad; nos no por papia mas di un Aruba safe y sigur; e prijsnan di hotel- y restaurantnan ta extremadamente halto; loke Aruba tin di ofrece na acomodacion (e “producto di hotel”) mes ta hopi bieu y anticua; e calidad di restaurantnan riba Aruba ta inferior; ta un tristesa pa wak con e amabilidad riba Aruba a bay atras, y pa loke ta trata cos di haci, divercion, aventura, bon ambiente social, cultura, y un bunita interior di un pais, Aruba simpelmente no por competi.

SHETE AÑA DI MAL MANEHO.
E mal maneho no ta data di e aña aki so, e ta andando pa shete aña caba!
Pero ta conoci cu pa añanan largo minister Oduber tabata produci cifranan falso pa turismo, y esaki door di añadi na e cifranan aki hopi cantidad di Venezolano cu ta bin haci uso di nos ATM-nan, cu ta bin “raspa”, of e turistanan di bao palapa cu ta tuma un baño den e fonteinnan den Caya Betico Croes.
Durante shete (7!) aña nada a ser haci pa mantene y conserva e calidad di nos playanan y e mar Caribe; nada a ser haci pa planea ni planifica renobacion di nos producto di hotel, ni pa atrae restaurantnan special (“specialité”), ni hotelnan nobo “niche”, ni pa posiciona e producto di hotel di Aruba, tampoco pa prepara e personal di hotel miho, of pa inspira nos poblacion pa turismo, siendo esaki nos unico fuente di entrada.
Pero tampoco no a tene e poblacion feliz, pa e felicidad ey “contamina” e turista na un manera natural y spontaneo.
Aruba tá “One Unhappy Island”, y esaki no ta scapa e turista!

78 PORCIENTO FELIZ ??
Kico e gobierno di AVP ta haci pa e felicidad di e pueblo Arubano?
Locual semper e ta haci, y locual e ta haci asina bon!
Esta, troce e berdad y publica storianan bunita den e medionan cumpra!
Mas infeliz e Pueblo Arubano no por ta; sinembargo, durante e conferencia di diamars y diaranson pasa den Renaissance Convention Center cu a carga e nomber asina curioso di “Happiness 360 Center”, e actual minister di Turismo Otmar Oduber y su antecesor y maestro, ex-minister di Turismo Robertico Croes, a bin trata na convence e publico cu 78 porciento di nos Arubianonan ta sinti nan mes feliz.
E makina di propaganda di e partido den gobierno ta draai “a toda maquina”.
E pueblo Arubano ta asina SUPER-feliz, cu e ta duna nos turistanan un servicio excelente y sobresaliente, y na nan turno nos turistanan tambe ta asina feliz y contento cu Aruba, cu nan ta pasa esaki over na henter nan famia, tur nan amigo- y conocirnan….pero con anto e maestro y su discipulo ta splica cu e cantidad di turista cu ta yega Aruba, ta sigui baha?

Remigio A.R. Wever, 42.10.01.44
Ex-director ATA
Savaneta, 17/09/’16

Comments

comments