Un reunion hopi pica cu palabra hopi fuerte di algun dirigente di clubnan cu ta preocupa p’e manera cu presidente ta dirigi Arubaanse Voetbal Bond (AVB), a mustra cu nan mal contento. Di otro banda, presidente di AVB Dijkhoff a mustra cu kascom no ta bin na discusion.
Tabatin hopi expresion haci riba e tema aki, unda e splicacion cu e presidente a duna, y cu e clubnan no ta di acuedo cu ne, ta cu FIFA a bisa, ta FIFA kier of FIFA a pone cu si e relato no pasa no tin placa pa sigui cu e campeonatonan cu ta andando.
Hopi dirigente ta puntra nan mes den kico tur e placa a bay cu ta forza un reunion riba dia ora cu bo seleccion nacional tabata hunga. A puntra con e persona aki como presidente ta mas preocupa p’e placa cu henter desaroyo di futbol.
Despues di hopi discusion y cu presidente a hunga riba sentimento di dirigentenan cu si relato no pasa lo no tin placa y mester para tur evento, e votacion a tuma luga. E resultado tabata 12 voto na fabor y 11 contra. Pues un resultado hopi preta cu no a cay den bon tera cerca presidente di AVB, kende cu un tono menasante a bisa cu esun cu a vota contra lo wak e consecuencianan.
Teamnan cu kier wak cambio tambe a bisa cu nan sa cu tin clubnan cu e presidente ta privilegia y por a scucha nan e momento ey,. Pero e teamnan cu kier cambio no ta bay stop pasobra ta ora pa futbol, tur club y hungadonan beneficia di loke ta e placa cu FIFA ta hinca den futbol di Aruba y no un grupito so. Por bisa cu directiva di AVB ta bou di wowo di horcan.