Durante luna di april aki “Mary Joan Foundation” a duna charla pa conscientisa y tambe tabata tin un actividad pa su clientenan.
Charla
Diasabra 7 di april 2018 pa 7.30 or anochi “Mary Joan Foundation” a duna un charla pa e grupo di damas Women’s Born to Lead (B2L) na Celebrations Church Aruba. MJF a elabora riba e parti con e fundacion a lanta y kico ta e vision y e meta di e fundacion ta. A elabora tambe un poco riba e actividadnan cu MJF ta organisa durante aña pa su clientenan y tambe riba e parti di
actividad/eventonan cu MJF ta organisa pa recauda fondo. MJF kier gradici Women’s B2L pa a duna e oportunidad den nan “Empowerment session” pa asina comparti cu tur e damanan e importancia di e fundacion, pa esunnan cu ta sufri di e malesa di cancer di pecho.
Actividad
Diadomingo 8 di april, MJF a tene un “koffie time in the jungle” na Grind koffie House pa su clientenan. E mainta tabata uno ameno caminda e clientenan a disfruta di un dushi brunch mientras nan a wordo deleita cu e dushi musica di Danny Koolman & Juameth Ignacio. A haci wega den forma di mimica caminda nan por a gana premionan. E mainta aki tabata uno hopi bunita yena cu hopi energia positivo y gratitud. MJF ta gradici tur clientenan cu a asisti na e mainta y asina hunto un biaha mas hunto a mustra con ta celebra bida den compania di otro.
Un mainta di informacion & creatividad
Diadomingo 22 di april, e candidata nan di “Miss Teen International” a pasa un mainta na e centro di “Mary Joan Foundation” caminda nan a haya informacion di cancer di pecho, con pa haci saminacion propio y e importancia di esey. Despues di e charla a sigui e parti caminda nan mester a expresa nan creatividad, skirbiendo un mensahe pa un cliente di MJF y hink’e den un boter cu nan mester a decora. E mensahe nan aki lo wordo uza pa encurasha e personanan cu ta confrontando e malesa di cancer.
Encuentro cu boluntario
Diamars 24 di april, a tene un encuentro cu boluntarionan actual y tambe persona nan cu tin interes pa bira boluntario. E anochi a bay masha ameno caminda e boluntarionan a haya informacion di kico e trabou di MJF ta den comunidad y kico tin riba programa pa e aña 2018. Durante e evento aki nan a inscribi nan mes pa traha den diferente area nan cu e fundacion ta Brinda.
“Mary Joan Foundation” a clausura e luna di april, aportando na nos comunidad cu diferente eventonan. MJF kier gradici e pueblo di Aruba pa e confianza y sosten na e fundacion.