‘Relacion entre tata y yiu na Aruba ta hopi zwak’

Manera conoci e aña cu ta bin aki na Aruba nos no lo tin carnaval, y normalmente durante e temporada aki bo tin FADA por ehempel cu ta organisa un carusel y via di esaki – na unda cu Telefon pa Hubentud tambe ta forma parti di dje – ta duna hopi informacion preventivo hunto cu otro organisacionnan.

Door cu no tin carnaval, ta nifica nos lo tin dos luna extra mas na Aruba, na unda cu hopi proyecto cu ta normalmente wordo planea pa haci despues di Carnaval, awor por tuma luga mesora manera aña start.

Telefon pa Hubentud tambe lo start cu diferente proyecto cu tabata canando caba na fin di 2019 cu door di Covid19 mester a para un rato. Un ehempel di un proyecto ta ‘Best Dad Ever’ cual ta pa stimula tatanan pa ta mas involucra cu nan yiunan. “Basa riba investigacion haci door di Unicef Honduras na Aruba, nos por a compronde cu un di e resultadonan tabata ta cu relacion entre tata y yiu na Aruba ta zwak,’ segun James Sneek, director di Telefon pa Hubentud.


Esaki a pone cu na 2016, Telefon pa Hubentud a cuminsa cu un proyecto nobo titula Best Dad Ever anto e proyecto aki ta stimula participacion di tata den loke ta educacion di yiunan. E fundacion ta haya cu 10 min pa dia den combersacion cu bo yiu ta suficiente caba pa crea un bon relacion. “Na momento cu e mucha tin confiansa cu e mayornan, hopi problema ta keda atras.”

Confiansa ta percura pa e mucha bay conta of comparti algo cu lo por ta tumando lugar. Anto esaki ta un proyecto cu ta stimula tur esaki cual ta zorg pa cantidad y calidad di ora comparti cu e mucha tambe ta subi.  Esaki ta un di e proyectonan cu lo yega start cu ne na 2021 pa asina yega cuminsa traha riba e parti preventivo, cual segun e fundacion esaki ta sumamente importante. “Prome cu desaroyo negativo bira un problema, nos kier atende cu esaki preventivamente pa evita e bira un problema.”

E fundacion kier a laga un mensahe na mayornan pa tuma e temporada unda ta mas hopi cu nos yiunan pa siña conoce e muchanan mas miho, combersa cu nan mas hopi y duna nan participacion. Naturalmente bo ta keda e mayor, anto e mucha ta keda e yiu. Telefon Pa Hubentud ta traha basa riba loke ta tratadonan internacional di derecho di mucha, cual ta subraya cu e mayor ta keda responsabel pa su yiu.  Sneek: “Pero nos ta bisa cu na momento tin un bon relacion entre mayor cu yiu, cu e comunicacion ta saludabel y tin mas momento pasando hunto cu otro, conoce y combersa cu otro, ta haci cu hopi problema no lo presenta.”

E fundacion tambe ta conseha hobennan pa ta mas habri y papia mas cu mayornan, crea un base di confiansa y a base di esey bo por conta bo mayor tur loke bo ta sinti pa asina e por yuda bo soluciona cualkier problema cu lo por tin.

Comments

comments