Nos ta den aña di eleccion y ya caba nos por nota cu diferente partido a cuminsa profila nan mes den un forma of otro. Manera Camara di Comercio y Industria di Aruba (KvK) a indica algun siman atras, e lo organisa dos debate. Pa medio di debatenan ta brinda e oportunidad na e votadornan pa conoce kico e programa di e partidonan politico lo encera. Di e forma aki e partidonan politico por elabora riba nan puntonan y splica pueblo dicon nan merece e confianza di pueblo pa por goberna e siguiente cuatro añanan. E debatenan lo tuma luga dia 8 di juni 2017 y 17 di augustus 2017.
KvK lo invita e lider of e representante di partidonan cu ta den Parlamento di Aruba pa forma parti di e debatenan. Via e encuesta online lo scoge cua lo bira e otro 2 partido politico a base di esun cu haya mas voto.
Pa medio di e comunicado aki KvK ta urgi tur otro partido cu ta desea participa den e debatenan pa nan entrega nan statuut y nan programa/manifiesto di eleccion.
Ta pidi e partido politico pa entrega e documentonan aki no mas tarda cu 31 di maart 2017 na email adres [email protected].
Entrante 3 di april 2017 KvK lo lansa un encuesta riba su website www.arubachamber.com pa publico por vocifera cua partido nan lo kier wak tambe den e debatenan. E dos partidonan cu no tin representacion den parlamento, cu haña mas voto den e encuesta, lo participa den e debate. Publico tin te dia 18 di april 2017 pa por indica su escohencia den e partidonan politico cu lo wordo menciona den e encuesta.
E debatenan lo ser transmiti en bibo via Tele-Aruba. Alabes lo tin e posibilidad pa esnan interesa ta presente pa asisti na e debate. Lo tin un moderador cu lo guia e debate y dirigi preguntanan riba diferente topiconan. E lidernan lo haya e oportunidad pa debati y elabora riba nan puntonan. E publico presente y e televidentenan na cas lo tin e oportunidad pa haci pregunta por medio di un panel independiente.
Mas informacion encuanto localidad, prijs di entrada y orario lo wordo suministra den transcurso di e proximo simannan. Pa cualkier otro informacion y/of pregunta por tuma contacto cu KvK via 582-1566 ext. 27/30/35/42 of via e-mail: [email protected]
Aruba, 10 di maart 2017
Camara di Comercio y Industria (KvK)