Reinier Koole ta wordo acusa di a asesina un persona di 33 aña di edad luna pasa y alabes sende un trailer na candela den e comunidad di Palm Springs. Awor e ta enfrenta cargonan di asesinato. Recientemente el a presenta den corte pa enfrenta e cargonan contra dje caminda e lo a asesina e homber Ramon Eduardo Herrera-Moradel. Na momento cu brandweer a jega na e sitio y paga e candela, nan a haya e curpa sin bida di Herrera-Moradel pafo di e trailer. E tabatin hinca fatal segun autoridadnan a duna informacion. Un punta di flecha a wordo haya den e victima su braza cu a keda descubri durante autopsia. Sherrif di e condado di Palm Beach a haya identificacion di Herrera-Moradel naci na Honduras y su cartera den e auto di Koole, kende den su declaracion a bisa cu esey a wordo poni den su auto p’asina culpe inhustamente.
Su amigo a declara tambe na autoridadnan cu el a mira un “pijl y boog” den e bahul di e Nissan blanco di Koole. Un hombre kende ta biba den e trailer y a pasa tempo cu Koole y Herrera-Moradel a declara na autoridadnan cu un discusion a start na momento cu Koole a coi un botter di biña di Herrera-Moradel. Akinan, segun declaracion di e homber aki, Koole a hisa su tshirt pa mustra cu e tin un arma di candela. E conducta di Koole despues di esaki a bira sumamente iritabel mientras cu e grupo di persona den e trailer a usa Cocaina, bebe alcohol y a hunga weganan di carta.
Na momento cu un persona den e grupo a dicidi pa sigui bebe na un bar, Herrera-Moradel a opta pa keda y drumi den su auto cu tabata para pafo dilanti e trailer. Koole tampoco a bai na e bar. Un otro residente di e trailer, kende tambe tabata den e trailer durante e “fiesta”, a declara na autoridadnan cu Koole tabata keda bati duro riba porta gritando: “Tin un homber morto benta dilanti e trailer”. Na momento cu e homber a habri porta di kamber el a mira cu e kamber di su compañero tabata na candela. Y autoridadnan a haya un container di gasolin den sercania.
Koole a declara cu el a regresa e cas pasobra el a pensa cu esnan eynan tabata debe placa y akinan ta caminda el a coi un slopi di cusinchi di e homber, cual tabatin 40 mil Dollar cash den dje. Koole a nenga rotundamente di a sende e candela. Koole, kende a nace na Aruba, tabata bibando na Delray Beach, segun autoridadnan. E ta permanece sera na “Palm Beach County Jail” sin posibilidad di sali bao fianza.