Diadomingo mainta, den careda di 6’or y 5 di mainta, a sosode un accidente grave riba caminda na Camacuri, na altura di MotorWorld. Segun e prome informenan, un Nissan Cube colo preto numera A-61366 a bolter, lagando e chauffeur benta bao di e vehiculo. E accidente aki ta marca e di cinco morto tragico den trafico na Aruba pa loke t’e aña.
Autoridad a responde rapidamente n’e luga di e accidente y a confirma e gravedad di e situacion. A pidi pa un ambulance di emergencia pa trata di salba e chauffeur, pero lamentablemente no por a haci nada pa salb’e. Pa 7’or y 10 di mainta, dr. Texeir a declara morto di e chauffeur, identifica como Reina Rosalinda Carolne Roga, di 33 aña, naci na Aruba, dia 22 di september 1990.
Specialista den trafico y polis tecnico a presenta, kendenan ta investiga e circunstancianan di e boltermento pa determina e causanan exacto di e accidente. Slachtofferhulp tambe a acudi pa duna sosten emocional n’e famia di e fayecido.
Cuerpo Policial di Aruba y MasNoticia ta expresa nan profundo condolencia n’e famianan di e fayecido. E di cinco morto aki riba caminda di Aruba ta resalta e importancia di siguridad riba caminda y e necesidad di medida pa preveni accidente fatal.
Cu Reina Rosalinda Caroline Roga sosega na paz.