Ya otro siman ta Pasco y Rehoboth Peace Land Boutique Hotel a prepara algo hopi special pa honra nos hendenan grandi cu un atardi alegre.
Segun Luz Adriana Santana, propietario di e Boutique Hotel, luna pasa tabatin un campaña den iglesia pa honra hende grandi. Y aki a bin e idea pa haci algo pa nan. A busca un cas di cuido, caminda a acerca nan. Finalmente diahuebs dies hende grandi a bin hunto cu nan.
Luz Adriana a conta di ta hopi contento pasobra tin di nan cu tin hopi luna cu no ta sali for di e luga y hasta por bisa pa varios aña.
Nan kier a haci algo bunita pa nan pero tambe kier motiva tur comerciante y e pueblo di Aruba pa corda riba nos adultonan mayor.
Luz Adriana a enfatisa cu no solamente durante e temporada aki di Pasco mester corda riba nan, pero tambe henter e aña. Ta lagando e hendenan grandi un banda y esey no ta bon, pasobra tur hende un dia lo bira hende grandi.
Henter e team di nan cafeteria ta hopi entusiasma y pa otro aña sigur lo bay sigui haci e echo aki. Nan ta bay adopta algun persona cu ta pertenece na un fundacion y/of cas di cuido, pa duna un tempo di calidad y pa nan experencia un luga asina fresco y bay sali come, bay tuma un koffie, pasobra ainda nan ta parti di nos sociedad.
Ora nos ta duna amor, nos ta haya amor bek. Ora nos mester duna pa gracia nos ta hay pa gracia. Cu esaki, Luz Adriana y su team, ta desa Aruba henter en particular nos adultonan mayor, un bon Pasco y un Feliz aña 2024.
