GENEVA, Suiza – E enviado Mericao pa Nacionnan Uni, Nikki Haley diamars a urgi e Conseho di Derechonan Humano di Nacionnan Uni pa saca tur e regimennan abusivo for di e Conseho y pone un fin na e asina yama “prehuicio anti- Israel”, advirtiendo cu su credibilidad ta den wega.
Haley no a menasa directamente di sali for di e organisacion si e preocupacionnan di Washington no wordo atendi, pero si ta un prospecto cu a lanta cabes na Februari ora cu un carta cu a leak door di Secretario di Estado, Rex Tillerson.
Pero Haley a uza su discurso, e prome pa un Embahador Mericano na Nacionnan Uni, cu base na Geneva desde su creacion na 2006, pa pone e Conseho na altura.
“Merca ta studiando e Conseho aki detenidamente nos participacion den dje. Nos ta wak algun area cu lo mester wordo fortaleci significativamente”, Haley a bisa.
“Siendo miembro di e Conseho aki ta un privilegio, y niun pais cu ta viola derechonan humano no por wordo permiti pa ta den e Conseho”, Haley a agrega.
E preocupacion Mericano den e Conseho di Nacionnan Uni a anticipa e eleccion di Donald Trump y Washington ya caba a pone un punto di agenda dedica exclusivamente na critica Israel.
El a lanta tambe preocupacionnan riba un proceso di nominacion unda cu gobiernonan autoritario ta haya un di e 47 asientonan rotativo den e Conseho.
Haley su critica di mas duro tabata dirigi ariba Venezuela, unda cu protestanan anti- gubernamental cu ta andando ya caba pa dos luna, a laga mas di 60 persona morto.
El a urgi Caracas pa “voluntariamente entrega su asiento, te ora cu e por pone ordo den su mesun cas”.
Segun Haley, e Conseho no mester permiti Venezuela pa tin un asiento den e Conseho.
Ademas di Venezuela, unda protestanan ta acusa gobierno di President Nicolas Maduro di represion sisematico, Burundi tambe ta forma parti di e Conseho, apesar di varios informenan di abusonan cruel perpetua door di agentenan di siguridad di estado.
Fuente: www.yahoonews.com