WILLEMSTAD, Corsou- Gobierno di Corsou ta nenga Venezolanonan cu a huy e derecho internacional riba proteccion. Den practica ta bira imposibel pa pidi asilo. Venezolanonan cu ta kedando ariba e isla sin un status legal, ta wordo cera den un centro detencion y den celnan di polis, prome cu nan wordo deporta. E circumstancianan di esaki ta preocupante. Esaki ta resultado di un rapport cu Amnesty International a publica. Tanto Corsou como Reino Hulandes tin e deber pa aborda e violacionnan aki di nan derechonan humano.
Mas y mas Venezolano ta huy di e crisis profundo den cual nan pais ta pasando aden. Venezolanonan cu ta critico pa cu e gobierno ta wordo intimida, aresta y persigui.
Tin un escasez grandi di cuminda y cuido medico, cual ta conduci na mas y mas victima y inkietud. Ya caba 2.3 miyon Venezolano a bandona nan pais desde 2014. E organisacionnan di Nacionnan Uni pa refugiadonan ta haci un yamada na e comunidad internacional (UNHCR) pa duna e refugiadonan Venezolano e proteccion necesario.
Corsou, un isla di solamente 70 km for di Venezuela, mescos cu tur e otro paisnan den e region, ta un santuario pa Venezolanonan. Segun calculonan al momento tin tin entre 5 cu 15 mil Venezolano sin un permiso di estadia ariba e isla. Sinembargo, apesar di cu gobierno di e isla ta bisa di tin un procedura di asilo, den practica, ta casi imposibel pa pidi asilo. Esaki ta contra di e derecho internacional ariba proteccion. Venezolanonan no tin otro choice cu keda ilegal ariba e isla.
Detencion y deportacion
Corsou tin un politica di deportacion activo. Na 2017, autoridadnan di Corsou a deporta 1532 stranhero, di cual 1204 (78.5%) tabata Venezolano. Den e prome cuater lunanan di 2018, a deporta 386 persona, 81,3 % di tur e deportadonan. Venezolanonan cu drenta di manera ilegal, ta wordo deteni direct na nan yegada of aresta en espera di nan deportacion, den baracknan di detencion. E circumstancianan eynan ta lamentabel, falta di privacidad, mal higiena y no tin suficiente cama. Mas y mas ta e Venezolanonan ta papia di abuso y maltrato durante nan aresto y detencion. Mirando nan posicion debil tabata imposibel pa keha cerca autoridadnan di esaki.