BEIRUT, Libanon- E desesperacion di hopi di e refugiadonan cu ta yega Libanon ta busca tur manera pa haya algo di placa pa nan por sobrevivi. Entre esunnan mas vulnerable, ta e refugiadonan Palestino, cu como cu nan tin status caba di refugiado na Siria, no por haya e status di refugiado na Libanon. Esaki ta pone cu hopi di nan ta cay den pobresa extremo. Nan no ta ricibi ningun tipo di yudansa for di gobierno Libanes. Nan deseperacion ta asina grandi, cu nan ta dispuesto di bende un parti di nan curpa. Y nan ta victimanan di e contrabandistanan di organo.
Segun di e contrabandistanan aki, Abu Jafaar, antes e tabata traha den un bar, pero aworaki su “trabao” ta di busca cliente cu ta dispuesto pa bende un parti di nan curpa. Y cliente ta loke ta sobra na Libanon. Esaki ta debi na e constante fluho di refugiado Sirio na Libanon.
Segun Jafaar, “mi ta probecha di nan, pero di otro banda, nan ta sali beneficia”. Su base di operacion ta un cafe chikito den un edificio den mal estado den un bario di Beirut. Aki ta unda cu Jaafar a negocia e benta di organo di casi 30 refugiado den e ultimo tres añanan.
“Generalmente e cumpradonan ta pidi riñon. Pero tambe mi a bende hopi otro organo”, Jaafar ta relata.
“Un biaha nan a pidimi un wowo. Mi a haya logra haya un persona cu tabata dispuesto pa bende un di su wowonan”.
E desesperacion di e Palestinonan
E cayanan hancho unda cu Jaafar ta busca “cliente” ta yena cu refugiadonan. Un di cada cuater persona den teritorio Libanes a crusa e frontera for di Siria, pa huy for di guerra. Leynan Libanes ta prohibi e mayoria di e refugiadoann pa traha den e pais, pa cual motibo hopi di e famianan ta hayanan den un situacion di hopi angustia y desesperacion.
P’esey, practicamente nan no ta ricibi yudansa y nan ta biba den pobresa absoluto den campamentonan sobrepobla.
Casi mesun vulnerabel cu e Palestinoann ta e refugiadonan cu a yega for di Siria despues di Mei 2015 ora cu gobierno Libanes a solitica ONU pa suspende e registro di refugiadonan.
“Esunnan cu no ta registra como refugiado ta biba den miseria”, Abu Jafaar a comenta. “Nan ta asina desespera y e unico manera pa haya placa pa sobrevivi ta door di bende nan organonan”.
Algun di e refugiadonan, specialmente mucha, ta mendiga ariba caya.
Algun di e menornan ta traha limpiando sapato of nan ta zwerf riba caya pa bende bals of cualkier otro cos.
Algun ta wordo explota den diferente empleo of nan ta termina den e mundo di prostitucion.
Pero bende un organo ta un manera di gana placa facil y lihe. Unabes cu Jaafar haya un cliente e ta hib’e cu su wowonan tapa na e luga secreto. Hopi biaha e dokternan ta opera den casnan gehuur, transforma den clinica temporal, unda cu prome cu e cirugia tuma luga, nan ta haci un test di e sanger di e donante.
Ora cu e operacion caba, Jaafar ta hibanan bek nan cas. E contacto ta sigui te ora cu mester saca e hilonan. Despues di esey, e donante ta keda pa su cuenta.
Su cliente di mas recien tabata un adolescente di 17 aña cu a huy di Siria despues cu su famia a muri den e guerra. El a bende su riñon pa 8 mil dollar pa e mantene su mama y su cinco ruman muhenan.
Fuente:BBC