Reflexion riba sentencianan di hues respecto violencia domestico

Carnaval ta tras di lomba y temporada di Cuaresma a cuminsa cu Diarason di Shinishi. Shinishi ta simbolo di arepentimento. Despues di e pica ta bin arepentimento y e arepentimento ta esun cu ta hiba nos pa mehora e situacion of pa no bolbe haci pica.
Mi a spera te despues di carnaval y mi ta aprobecha e Dia Internacional di Hende Muhe, pa cumpli cu peticion di varios hende muhe cu a reacciona fuertemente riba sentencia di hues den un caso di violencia domestico.
Violencia domestico ta algo tristo cu ta sosode den un hogar. No ta facil pa skirbi riba esaki, pero mi ta bay hacie como reflexion pa e tempo di Cuaresma, pa nos tur pone atencion riba e manera con nos ta trata otro den nos hogar.
E ehempel cu mi ta bay duna ta referi na un caso unda un tata di famia, pa varios aña, a maltrata su esposa y su yiunan di un forma brutal. Esaki a hiba e pareha na divorcio y na declaracion di e yiunan cu nan ta prefera di no tin contacto mas cu nan tata biologico. Despues a resulta cu e persona aki a yega di abusa sexualmente di un familiar femenino, for tempo cu e tabata un mucha y tambe supuestamente a abusa di un otro menor di edad. Awor na grandi, e prome victima a entrega un keho y e homber a ser encarcela. Den tratamento di e caso aki e prome caso di abuso sexual a ser comproba, pero e di dos caso no. E sentencia final di hues tabata un castigo condicional di un aña! Como e agresor a sinta algun luna caba den prison, el a sali liber.
Pa mas cu 15 aña cu mi ta haciendo investigacion riba violencia domestico, mi ta haya hopi hende muher ta critica e sentencianan di hues, como un sentencia (castigo) demasiado abou cu NO ta hiba na discurasha un homber pa no bolbe comete abuso sexual, especialmente cu menornan. Maske e castigo pa e actonan aki a subi den e Ordenansa Penal nobo, toch e sentencia di hues ta keda hopi abou. Motibo pa e critica aki ta comprendibel, pasobra pa e homber, e condena ta un aña condicional (no cera), mientras cu pa e señora, su yiunan y especialmente pa e hoben femenino cu a ser abusa for di mucha, e sentencia/castigo lo dura henter nan bida largo (levenslang)! Tur estudio mundial ta bisa esaki, pasobra nan lo no lubida e dolor y e humiliacion, nunca mas. Esaki hopi biaha tin como consecuencia negativo: rabia, depresion, poco autoestima, problemanan fisico y mental, problema pa stima un persona y forma un hogar. Terapia pa por sobrepasa e emocionnan ey ta rekeri tratamento pa hopi tempo. Nos ta mirando hopi di e casonan aki den nos comunidad. Ta bira tempo pa, cu tur respet, hala atencion di e huesnan riba esaki. Mi ta para keto tambe un rato na e agresor mes. Estudionan mundial a comproba cu un agresor mes, den su hubentud, casi semper tabata victima di varios abuso, manera abuso verbal, fisico y sexual.Loke bo a biba na cas, den hopi caso ta ser ripiti den bo propio hogar. Esey ta ser yama violencia trangeneracional pasobra e ta ser pasa di un generacion pa otro. Of e circulo vicioso di violencia . Pa e motibo aki e agresor tambe mester ser trata cu diferente
terapia manera angermanagement pa surpasa e rabia y e agresividad cu nan tin paden y cambia nan manera di trata otro hende y maneha conflicto.
Ripara cuanto dolor y rabia violencia domestico ta causa den un hogar. Ripara tambe cuanto placa e ta costa comunidad (gobierno = pueblo) pa atende tanto e victima(nan) como e agresor. P esey como reflexion pa Cuaresma mi ta pidi tur hende di Aruba: pone atencion na con ABO ta trata bo sernan keri na cas. Esposonan, Mayornan cu nan Yiu(nan) y vice versa. Bo manera di papia, bo uzo di palabranan, bo ta uza palabranan mahos, of bo ta grita of papia cu golpi? Na bo trabou: con bo ta trata bo coleganan?
Ban purba di kibra e circulo vicioso di violencia! Trata di cambia pa mihor y lo bo nota con bo relacion cu bo sernan keri ta bira agradabel, pasobra nan ta basa riba respet y amor pa otro. E ambiente na cas y na trabou ta bira dushi. Esey ta loke Hesus ta pidi nos: Stima otro, manera Tata ta stima nos. Ban duna Hesus, cu a regala Su bida pa nos, nos mes y nos famia, e regalo aki. Por favor: HACIE. Mi deseo ta: Cu e reflexion aki di Cuaresma lo trece PAZ y AMOR den bo hogar y pa esaki hiba nos na un dushi celebracion di Resureccion di nos Señor Hesus.
Mr. Lily Rasmijn-Marval

Comments

comments