Diadomingo ultimo tabata Dia di Mama Tera (Earth Day). Un dia pa refleha di con nos mester conbibi cu Mama Tera y mester ta zuinig cun’e. Esey no ta facil, pero danki Dios tin Julian Lennon, yiu homber di e legendario John Lennon. Den su mensahe el a duna reglanan duidelijk, unda cu nos, como sernan humano por duna di nos parti pa laga e planeta atrás pa nos yiunan.
Julian Lennon a indica cu no ta e hende ta doño di Mundo, nos no por haci kico cu nos kier cu nan, sin tene cuenta cun’e. E ta duna nos alimento, aire y material pa nos traha nos cas. Pero si nos kier algo di dje, nos mester pidi’e na un bon manera y dun’e algo a cambio.
Y aki ta caminda cu e rabo di porco ta krul pa Aruba. Aparantemente companianan, cu fin di lucro, ta tuma tur cos for di nos isla, sin tene cuenta cu e bienestar di e planeta riba cual nos Arubiano ta biba.
Nos minister di Husticia na maart di e aña aki tabata un di e promenan cu a mustra curashi, despues di tantisimo kehonan di habitantenan rond di Seroe Cristal, di a detene e excavacionnan devastador temporalmente y tambe e actividd di un planta di concreet recientemente habri.
Habitantenan den vecindario y Fundacion Conserva Area Cristal a dicidi di tuma accion, door cu pasa e limite di tolerancia y por mira claramente un aumento drastico den e molester causa door di e destruccion y excavacionnan. Pa hopi, awo si ta duidelijk e daño ireparabel causa (manera DIP ta yama esaki) cu a wordo causa na e flora y fauna di un area berde cu balor historico y arkeologico pa Aruba. Entre tanto tin mas di 1200 firma y bezwaar entrega door di e habitantenan y simpatisantenan contra di e ‘hindervergunning’ nan recientemente pidi. Esaki tin como meta pa legalisa e destruccion masivo cu ta tumando luga.
Niun di e companianan cu ta trahando na e area ta dispone di e documentacion huridico necesario manera un ‘hindervergunning’. Mirando e carácter ireversibel di e daño causa, ta na su luga cu e minister a para e trabaonan y a dicidi di lansa un investigacion di con e situacion a desaroya y kico por wordo haci pa remedia esaki. Den palabranan di Julian Lennon: Ora cu bo tuma algo di Mama Tera bo mester pidi’e na un bon manera.
Dia 17 di april a tuma luga un kort geding den corte, caminda cu e companianan afecta door di e decision di e minister, tabata exigi pa nan por a sigui cu e trabaonan. E decision di hues ta poni pa dia 7 di mei proximo. Tabata alentador pa Fundacion Conserva Area Cristal y habitantenan pa por a duna nan opinion den corte. Nan a aplea pa e stop permanentemente cu tur excavacion y pa prohibi cualkier actividad industrial den e area di Seroe Cristal, cu den e ROP ta nombra como ‘area proteha’. E tiki berde cu a resta na Aruba, mester keda berde. Ta trata Mama Tera netjes.
Ta di compronde cu e pensamentonan aki ta linea recta contra di e interesnan financiero di e companianan envolvi. Proteccion di medio ambiente no ta bay man den man cu e mundo di mineria. Hues, como tambe e minister lo mester evalua entre e interes di algun, manera e empleado di e mineria y e central di beton, of e proteccion di un pida tera, oficialmente un area proteha na Aruba y asina tambe proteha loke a resta di e flora y fauna pa nos yiunan y nan yiunan. Si scoge pa e ultimo aki, e ora nos ta ariba e bon caminda di realisa e palabranan di Julian Lennon: Duna Mama Tera bek, loke e a duna nos. Cada un di nos lo mester tuma e tempo pa evalua den ki direccion nos kier bay y unda nos kier yega pa e siguiente generacion. Nos tur mester yena nos mes di curashi y mustra cu nos kier esaki tambe.